Snapchat hmang ṭhin mtd 850 chuang an awm

Photo and video sharing app zingah tleirawl lamin an hman uar tak, Snapchat hmangtu hi khawvel pumah mi mtd 850 chuang an awm. Daily user hi 2024 second quarter-ah mi mtd 432 vel an ni.

Kum 2011-a launch, Snapchat hi khawvel huap pawhin social messaging leh photo sharing app lar ber zingah a tel a, co-founder leh CEO Evan Spiegel chu khawvela social media entrepreneurs hausa ber zingah a tel phak tawh. Headquarters hi Santa Monica, United States-ah a awm.

India chu Snapchat hmangtu tamna ber ram niin user mtd 202.51 an awm a, US chu pahihna niin user mtd 106 chuang an awm bawk. Pakistan, France leh United Kingdom te chu hmangtu tam zualna ram panga zingah an tel.

Kum 2011 aṭangin feature hi 101 an siam tawh a, heng zingah hian Stories, Spectacles, voice filters, Bitmoji TV leh Spotlight te an tel. An app-ah hian chawhrualin nitin 5+ billion snap siam a ni ṭhin. User-te hian Snapchat khawihna atan hian ni khatah minute 30 vel zel an hmang anga chhut a ni bawk. Internet hmangtu, kum 15-25 inkar zinga 48% chuan Snapchat hi an khawih tel. Ṭawng chi 37 in a hman theih tawh bawk a ni.

Customer satisfaction scale-ah pawh a che ṭha thawkhat hle, point 100-ah 72 hmuin, X leh Facebook te aiin a hmu ṭha a, mahse Pinterest leh Instagram erawh a pha lo thung.

Kum 2024-a Snapchat-in a sum lakluh tura chhut hi USD tld 6.11 leh, kum 2026-ah USD tld 7.26 tling tura chhut a ni bawk.