Fak Zai top five zaninah inel dawn

General PYD (Mizoram UPC) leh Literature & Publication Board-te buatsaih Pentecost Fak Zai hmawr bawk a hnai a, zaninah top five-ten intihsiakna an nei tawh dawn.

Mizoram UPC Conference Hall, Zonuama intihsiakah hian top 10 aṭanga thlanchhuah zaithiam pangaten intihsiakna an nei dawn a, zan dar 8:00-ah inelna ṭan tur niin General PYD YouTube channel leh Zonet Rimawi lamah live-a pekchhuah a ni ang.

Live music nen inelna hi neih tur niin, hla pakhat ṭheuh sain inelna hi an hmachhawn dawn a ni. Fak Zai chief Judge Rev. Dr. Ngurthanpara Sailo chuan, "Inelna tak tak hmachhawn turin an inbuatsaih a, a sang ber thlen tumin an ṭang em em vek. Hei hian kan inelna a tihmuhnawm lehzual a, show a tihlu lehzual sawt a ni," tiin Vanglaini a hrilh.

Fak Zai top five-ah hian Dinthar tleirawl zaithiam C. Lalruatsangi, Buhchangphai tleirawl Malsawmzuali, Ramthar Hreichuk lam 'product' Shion Lalbiaknunga, N. Chaltlang tlangval C. Chawngsangzela leh N. Mualcheng nula Sylvia K. Ramdinsangi te an inlan dawn.

Fak Zai top five aṭang hian a thiam pathum thlangchhuakin, mi pathumte hian August 29, Ningani zanah Grand Finale hmachhawnin, a thiam ber an zawng dawn a ni.