Cristiano Ronaldo-a'n YouTube channel record a siam

Football legend Cristiano Ronaldo chuan Nilaini, August 22 khan a official YouTube channel, 'UR Cristiano' siamin YouTube record a rawn siam nghal.

Khelmual chhung leh pawn lama a che tlain ngaihven a hlawh bawk a, Nilainia YouTube channel a launch thu a puan aṭanga minute 90 chhungin subscriber maktaduai khat chuang a nei tling nghal a, million subscriber nei rang ber record a siam a, Nilaini zanlai khan subscriber hi mtd 10 an tling hman a ni. Ronaldo hian social media lamah follower a ngah hle a, X-ah follower mtd 112.5 neiin, Facebook-ah mtd 170 leh Instagram-ah follower mtd 636 a nei a ni. A hmaa YouTube-a subscriber maktaduai nei tling rang ber record siamtu chu Blackpink member Jennie Kim a ni. Kumin January 25 khan Jennierubyjane Official channel siamin, darkar sarih tling lo deuhah subscriber maktaduai khat a nei hman. Mahse a record siam hi CR7 hian a rawn khum ta a ni.