Miss Chapchar Kût hnenah lawmman an hlan

Nimin chawhnu dar 2 khan Chapchar Kût 2015 Miss thlan chhuahte hnenah lawmman hlan a ni a, hetah hian minister R. Lalzirliana chu Khuallian niin, Khualzahawm hi Vanlalawmpuii Chawngthu, MLA a ni.

Miss Chapchar Kût lawmman hlanna inkhawm hi Lalhmachhuana Zofa chuan kaihruaiin, Rev. Dr. Chawnghmingliana'n hunserh a hmang a, Khuallian leh Khualzahawm te hian thu an sawi.

Khuallian, R. Lalzirliana, Home Minister chuan Chapchar Kût Miss-te hi fuihin, mihring nun tichhetu chu dawngdahna a ni tih sawiin, thatchhiatna hi mihring hmelma lian tak a ni a ti. Mipat hmeichhiatna hman khawlohna kawnga fihlim tur leh, hei hi mihring nun tichhetu lian ber a nih thu a sawi a, Chapchar Kût Miss an nih hnuah an tih ngai loh thil ṭha tam tak an tih a ngai tawh dawn a ni, a ti bawk. Minister chuan, "Hmelṭhat tluantlinna chu nungchang mawi leh nundan ṭha a ni a, rilru ṭha pu zel rawh u," tiin a fuih.

Khualzahawm, Vanlalawmpuii Chawngthu chuan, "Milar leh mite hriat in ni tawh dawn a, hetiang dinhmunah hian thiktu leh ertu an awm ang. Chung zawng zawng chu chhel taka tawrh a ngai a, nun uluk a ngai a ni," tiin a fuih. Nu leh pate zah thiam turin a chah a, hna thawh hreh engmah nei lo tura chahin, mahni nihna anga lang ngam mi ni turin a fuih bawk. Incheina uluk tura a duhpui thu hrilhin, "Sexy deuh deuha incheina hian midangte rilruah sual a siam thei a ni. Hnam dang hmuhah phei chuan kan incheina kan uluk zual a ngai. Zahawm taka kan incheina hi kan zahawm lehzualna a ni," a ti.

Kumin Miss Chapchar Kût hi H. Vanlalhlimpuii, Ramhlun North a ni a, Rs. 10,000 a dawn bakah, kumin chhungin thla tin Rs. 1,000 a dawng dawn bawk. Hei bakah hian Samsung 3:16 Plan Solution chuan washing machine a pe a; photo album, lehkhabu, citation te a dawng bawk. First Runner Up hi Brenda Laldampuii niin, Second Runner Up hi Nathale Zodinpuii a ni a, Third Runner Up-te hi K. Lalremruati, Sharon Lalruatkimi, Zoremmawii Ralte leh Christina Lalmuanzuali te an ni. Anniho hian Rs. 2000 ṭheuh bakah, Samsung 3:16 Plan Solution aṭangin smartphone, citation, photo album leh thil dangte an dawng hlawm.