Zaninah 'Tahchuan a leng' tlangzarh dawn

Zaithiam Joseph Zaihmingthanga film, a hun laia a hla hit berte zinga mi, 'Tahchuan a leng' tih hla lo pian chhuah dan film-a siam chu zanin hian Vanapa Hall-ah tlangzarh a ni dawn.

'Tahchaun a leng' hi Mizo biopic changtlung hmasa berte zinga mi niin, Mizo streaming platform Runmawi chu producer niin, director hi Lalsangzual a ni. Ani hian 'Zeuh Keuh' tih film pawh a lo direct tawh a ni. Kima Renthlei (OBG Producion) chu DOP a ni. He film hi Joseph Zaia nu, Lalmalsawmi phalnaa siam niin, Joseph-a'n a lo sawi tawh, a taka a tawn angte leh a chhungte bakah, a hla a lo phuah chhan Apuii ngei pawh biak niin, chutiang mil thei tur ang bera buatsaih a ni.

A changtute hi Stephen Lalrinawma, Vanlallawmawmi, Laraw Colney, Lallianpuia Thangluah, Jonathan Khiangte, Vanlalawmpuia-te an ni. Vanapa Hall-ah zanin dar 7:30-ah release-a screening nghal tur a ni a, a hmuna en duh tan Rs 150/-in a en theih a, online-a lei theih a ni a, Runmawi Instagram page-ah lei dan tur kimchang tar lan a ni. A hmunah ticket lei tur a awm bawk ang. 'Tahchuan a leng' hi Runmawi app-ah en theiha chhawp chhuah nghal a ni bawk ang.