Social 50-ah Taylor Swift

Social networking site lama lar thlan chhuahah Taylor Swift chu a lar ber a, ani hi nikumah pawh pakhatna a ni tawh.

Social 50 hi YouTube, Vevo, Facebook, Twitter, SoundCloud, Wikipedia, MySpace leh Instagram-a milarte an ni. Zuitu leh like-tu an ngah dan aṭang ringawta teh a ni lo a, an ṭhian leh fan-ten kartina an page an tlawh leh thlir dan aṭang te, an hlan an play ngun dan te, an comment aṭang tea teh a ni.

Taylor Swift hian a zawnin pakhatna ṭum hnih a hauh ta a, ani hi a album 1989 hi a hlawhtlinpui ber tiin a sawi ngam ang. Hei bakah hian social networking site hmang hian a fan leh ṭhiante a kâwm nasa a, a hmang ṭangkai hle a ni. Pahnihnaah Ariana Grande a awm a, a ngaihzawng neih chungchang te, Victoria's Secret Fashion Show-a a zai avangte leh a music avangtein a lar a ni ber.

Justin Bieber hi kumin chuan pathumnaah a rawn kai chho. Nikum khan parukna a ni a, a chanchin ṭha vak lo, chumi avanga a insawifiahna, Selena Gomez nena an chungchangte avangin social networking lamah a lar chak hle. Selena Gomez chu palina a ni a, nikum pawh khan palinaah a awm. Justin Timberlake chu pasarihna aṭangin panganaah a rawn kai chho.

Top 10-ah hian Kanye West a rawn lang thar. Kanye West hi nikum khan 36-na daih a ni a, kuminah erawh chuan parukna lai a rawn luah pha ta. Hetiang taka hma a rawn sawn theihna chhan pakhat chu a album tihchhuah tur, So Help Me God vang a ni. He a album chungchang hi February 28 khan Twitter kaltlangin a pho chhuak a, hemi rual hian a kâwm tur pawh a tilang nghal bawk.

Katy Perry chu a tlahniam thung a, nikum khan pathumna a ni a, kuminah pasarihna a ni ta daih thung. Ed Sheeran chu sawmna aṭangin pariatnaah a awm tawh a, Beyonce chu pakuanaah bawk a awm. Rihanna pawhin hma a sawn nasa hle a, nikuma 20-na kha tunah chuan 10-naah a hming a rawn lang ta. A hla thar Dancing in the Dark vang a ni ber.