Fashion Fiesta

Designer-te hlutna kan hre chho ve tual tual a, designer ni tura pawimawh te pawh kan inhrilh nual tawh a. Institution ṭha leh ṭha lo a zirin designer te pawh an hluin an hlu lo tih te pawh kan hrethiam awm e. Chuvangin kar hmasa lamah institution ṭha zual, India ram chhunga mi te kan thai lang ta bawk a, tun ṭum chu mi nawlpui leh Zoram ṭhalaite duhsakna avang zawkin kan ram chhung ngeia institution-te ziak dawn teh ang. Changkannain Zoram ṭhalai te min run nasa hle a, Korean fashion lam phei chuan min chiah hneh hle. Khawthlang lam leh milar zaithiam leh lemchan thiam ho incheidan kan entawn awl lo. Hnam inchei bil pawh kan nei ta meuh lo em ni chu aw, tih turin kan duh dan danin kan inchei ta a. Designer lam pawhin design satliah mai ni lo, midang aia lansarh theihna tur ang berin thil dangdai hmuhchhuah tumin kan phe ta suau suau mai. Midang aia a danglamna kha dawrtu a ngah phahna a ni miau a.Chungtiang khawvelah chuan Zoram chhungah ngei pawh institution changtlung leh ṭha tak tak a inhung ta fer fur mai.

Kan tleirawl laia kan hriat hma­sak pawl, ti ve khanglang ila, Lucy School of Fashion Designing, Zarkawt-a awm hi a hmingputu, Lucy hi Zorama designer ka hriat hmasak ber niin, 2002 aṭang daih tawhin 4/5 months course hemi school-ah hian kum khatah batch hnih tan a zir theih a, ṭhalai tam zawk bawh rawn a la ni ta fan a ni. Central hnuaiah tuna fashion designing bika a changtlung ber a ni awm mang nge aw tih turin Womens Polytechnic Durtlangah 3 years Diploma course-in Garment Technology, pawl 10 pass tan zir theihin a awm bawk. 2001 daih tawha he course hi zir theiha buatsaih a nih vang nge ni, puanṭhui thiam tam tak he institution chhuak, Zoram chhung ngeiah pawh an tam tawh hle ni. April-ah form lakchhuah theih a ni a, May thlaah entrance exam, Maths, English leh Gk-ah te neiin, hemi test paltlang te chu personal interview an hmachhawn leh a. Chuta tlingte chuan kum 3 chhung, semester 6 lai mai, heng illustration, lemziah, stitching, a ṭhui lam leh khawl chanchin bakah mass production lam thlengin zirtir an ni ṭhin a. Zoram chhungah chuan a changtlung ber pawl a tih theih awm e.

Heng bakah hian sawi hmaih phal loh chu, scholarship bakah Delhi-a factory lianah te excursion neih ṭhin a nihna hi, designing-a tui, sum leh pai nei lutuk lo tan phei chuan pan ngei chi niin ka hria. Kan sorkar pawhin Zoram ṭhalaite hmasawn lehzual nan vocational course ching chhuakin Zemabawk Higher Secondary School, Vocational School of Education, Chaltlang; Oasis, Chhinga Veng leh Mamawii Higher Secondery School-ah te heng Commercial Garment and Design ah te vocational course te hi zir theihin a ni. Advanced apparel design, clothing construction leh marketing te zirin nasa takin designing lamah ṭhalai te a pui nasa em em a, theory leh practical neiin, kum tawpah board exam beiin, science leh maths subject te ang thoa lak theih a ni.

Heng bakah private lamah changtlung tak tak sawi tur a awm a, Vakiria Institute of Fashion Technology te hi mi tam zawkin kan hmelhriatin a rinawm. I year certificate course niin, kum khat chhungin zirlai te lemziah, ṭhuipar, puanṭhui leh fashion show thlenga neihpui niin, mumal taka kumtina fashion show buatsaih ṭhin awm chhun a ni awm e. Heng show te ṭangkaina em em chu zirlaite inkarah inelna thianghlim pein an kal zelna turah Zoram mipuite hmelhriatna hun an pe ṭhin hi thil ṭang­kai leh pawimawh tak a ni. Heng bakah Nimat Chaltlang, tunhnaia rawn siamthar Pearl te pawh belhchian chakawm tak tak te an ni. Heng bakah hian puanṭhui hlun tawhte hnuaiah zirna 6 months course leh 3 months te awmin Pi Dawli, Dawrpui te leh puanṭhui hlun te hnuaiah professional course ni lo deuh puan ṭhui ngawr ngawr te zir theihin a ni. Kan ṭhalai lam te, abikin thingtlang lama awmte tan kan tarlansak a ni e.

Tluangpuii Hmar
Instructress
Vakiria Institute of Fashion Technology