Lay Up tan hlawhtlinna kar

MSL Dance Battle a hmuh­nawm chho zel a, dance crew te an ṭang nasa tial tial a, ṭang rau rauah Lay Up an ropui a, kar liam taa dance battle vawi li awmah vawu hnih an chak. Monadikos leh Diamond Shark te pawh an hlawhtling e.

Thawhlehni zana Zarkawt BCA leh Khatla TBL inkhelah, BCA home crew Emerge leh TBL away crew Lay Up te an inhmachhawn a, Lay Up crew te hian point 1-in hnehna an chang ta zawk a ni. Emerge te hi an battle vawi thumna a ni a, a hmain an lo chak ve ve tawh a, tun ṭumah hian performance lamah Lay Up te hi an hneh ta lo. Lay Up hian an choreography-ah contemporary, bollywood leh hip hop te an rawn telh a, a hmuhnawm dangdai hle.

Ningani zana Tuikual South BC leh Zarkawt Serpents inkhelah, Tuikual South Home crew BGMX leh Serpents Away crew Monadikos te an inhmachhawn ve thung. BGMX hi mipa hlang niin, Monadikos hi hmeichhe hlang an ni , BGMX hian choreography an nei ṭha a, an idea pawh ṭha hle, mahse confidence leh execution an tlachham a, hetah hian Monadikos hian an rawn hneh ta a ni. Monadikos hian costume te nen nalh takin an rawn bei a, mahse an inthlauhna hi point 1 chauh a ni.

Zirtawpni tlaia Mission Veng Vikings leh Zarkawt BCA inkhelah Vikings home crew Diamond Shark leh BCA away crew Anony­mous Signs te an intum ve thung. Anonymous Signs te hian props atan table leh handcuff an hmang a, mahse an performance-in Diamond Shark te hi a pha ta lo. Diamond Shark hi MSL ṭan zana an battle tih lohah chuan an la chak tluang zel.

Zirtawpni zana Chaltlang Ryders leh Khatla TBL inkhelah, TBL ten a zawna Away-a an khelh leh nghal avangin Tuesday zana chak zo chiah, Lay Up ten Ryders Home crew Sharp Kats te an hmachhawn leh nghal. Ni hnih chiah choreography siama zirna hun nei ni mah se an chak zawk ta tho. Ryders home crew Sharp Kats te hi an lâm hmasa zawk ai khan hma an rawn sawn. Hetihian Lay Up te hian battle vawi 5 hmachhawn turah vawi li an hmachhawn tawh a, vawi 3 an chak. Final lut thei tur erawh chuan an battle hnuhnung berah hma an rawn sawn hle a ngai ang.

Tunkar hian dance battle vawi li tho a awm leh dawn a, Thawhlehni zanah Serpents Home crew Myn’X leh Ryders Away crew Crzay Bee te an intum ang a, Ningani zanah TKS Home crew BGMX leh Vikings Away crew Dance & Beatz te an lam thung ang. Zirtawpni tlaiah, Ryders Home crew Sharp Kats leh Serpents Away crew Monadikos te an intum leh ang a, hemi zanah TBL Home crew Nerds of War leh BCA Away crew Anonymous Signs te an in-battle thung dawn a ni.