Ṭhazualah a Ṭum thum nan MAGGIE

Dafodils Ṭhazual Fakna chart siam aṭanga a ṭum thum nan Maggie chuan pakhatna a rawn hauh. Maggie hian a hla, Hmangaihna Par Tlanin tih hla hmangin pakhatna a rawn hauh a, a hmaa pakhatna hauhtu Temi Sailo a rawn nek chhuak.

Nikum, 2014 January 6-a Dafodils Ṭhazual 10-ah khan Maggie hian 'Isu eng la' tih hla hmangin pakhatna a hauh a, nikum November 23 khan 'Min siam thar leh rawh' hla hmangin Maggie hian pakhatna a hauh leh bawk. He hla, Min Siamthar Leh Rawh hi hi Janua­ry 5 thleng khan Ṭhazual chart-ah hian a lang. Hemi dawt chiaha ṬDafodils Ṭhazual Fakna tihchhuah leh, January 19 aṭang khan Maggie hla thar, Hma­ngaihna Par Tlanin tih hla hi a rawn lang ṭan thei nghal a ni.

A rawn lan tirh hian paruk­naah bul a ṭan ṭha a, bul ṭan ṭha pawl tak a ni. February thla kan chuankai khan palinaah hma a rawn sawn chho nghal a, chumi hnuah panganaah a tla thla leh a, pathumnaah chho lehin, tunah chuan pakhatna a rawn hauh thei ta a ni. Maggie hi a zaithiam a, a aw a chak a, a zai a nghet a, ngaihthlak a nuam. Chubakah a video a ṭha a, a hmuhnawm tel, hei hian a vawrh hle a ni.

A hmasaa pakhatna, Temi Sailo chu pahnihnaah a chhuk thla a, Temi Sailo hi pakhatnaah ṭum hnih a awm hman. A hmaa pahnihna, Hmingtea & Sailo Nutei te hla, Kir Leh Rawh chu panganaah a chhuk thla leh bawk. He hla hian pakhatna a hauh thei ang em tih rin thiam a harsa a, a awmna hmun a thlak nasa hle. Mahse thleng thei lo erawh a awm lo. Pathumnaah Bethsy Fanai a rawn lut chho thung a, ani hi a hmain palinaah a awm a, hma a la sawn zel a rinawm viau.

Tun ṭum chu top 10-ah lut thar an awm lo a, a awm ngaite erawh an awmna hmun a danglam nasa viau.

Dafodils Ṭhazual Fakna
1 Maggie - Hmangaihna par tlanin
2 Temi Sailoi - Kraws thu
3 Bethsy - Min hmangaih si a
4 Angela Lalremtluangi - Min hrilh fo rawh aw
5 Hmingtea & Sailo Nutei – Kir leh rawh
6 Betea - Lungchhir a sawt lo
7 Tabithians - Hei hi ka duh ber
8 Pensy - Chhan tlak ka ni em ni
9 Lalhlumawii - Lei leh van siamtu
10 TBC Zaithanpuia – Fak zel che ka duh