Zaithiam inkhelmi

Social networking site-ah te zaithiamte an lar a, an buk a rit em em Ṭhin kha a ni a, mahse tunah chuan a ni tawh lo. A bikin Facebook-ah chuan zaithiam aiin footballer a ropui zawk a, hei hian football khawvel hian ngaihventu a ngah a, en a hlawh a tilang.

Facebook-ah hian a hmaa page like-tu ngah ber chu Shakira a ni a, ani hi FC Barcelona nena inzawmna thuk tak nei a ni a, a pasal hi Barca player Gerard Pique a ni. Mahse he zaithiam, Shakira hi Real Madrid lam aṭangin an rawn khûm ta tlat. A rawn khûmtu hi tudang ni loin, Real Madrid-a share nei ve, an player ni bawk Cristiano Ronaldo a ni.
Shakira hian tunah hian Facebook-a a page chu like-tu 107,080,235 a nei mek a, Cristiano Ronaldo hian 107,142,049 neiin a rawn khum ta a ni. An inthlauhna hi a tam lo hle mai.
La Liga lamah Real Madrid aiin Barcelona point khatin an sang a, Facebook lamah mi tlêm tê hmangin Real Madrid nau a sang zawk thung. Mahse a club mal angah chuan Barcelona hi Real Madrid aiin like-tu a ngah zawk tho bawk. Club mala FB-a like-tu ngah lamah Barcelona hi 10-na a ni a, Real Madrid hi 11-na a ni thung.
Infiammi zingah Cristiano Ronaldo hi a sang fal hle a, pahnihna, Lionel Messi aiin maktaduai 29 zetin a sang zawk. Messi FB page hi mi maktaduai 78-in an like a ni. Pathumnaah David Beckham awmin mi maktaduai 52 ten an like bawk.
Facebook lamah chauh ni loin Twitter-ah pawh Cristiano Ronaldo hi a lar hle a, infiammi zingah Twitter-a follower ngah ber a ni. Twitter-ah hian Ronaldo hian zuitu maktaduai 34 a nei a, pahnihna chu Ricardo Kaka a ni a, maktaduai chuangin an inthlau.