Antarctic-ah hnim ṭona a zau

Hnim ṭo chu thil lawmawm a nihna chen awm mah se, a ṭona hmun azirin ngaih a ti ṭha lo thei. Antarctic-a hnim ṭo hi thu lawmawm lo a nihna chin a awm a, khawvel a lum zel a, Antarctic-a vûr a tui zêl tih lantirtu a ni a, hnim ṭo thei tur khawpin boruak a lawm tawh a, a lum zela hnim ṭo theihna chin pawh a zau zel tih min hriattirtu a ni.

Antarctic khawmual, tuifinriat kam te hi nipuiah chuan vur a tui nasa tawh ṭhin hle a, hnim ṭo thei tur khawpin nipuiah chuan khawmual, tuifinriat hnaihte chu a awm tawh ṭhin a, hnim ṭo theihna chin pawh a kum telin a zau zel. Tuna hnim ṭo an tihte hi Antarctic pearlwort leh Antarctic hairgrass te an ni a, heng thlai chi hnihte hi hnim dang aiin nitrogen an hipral chak zawk. Heng bakah hian lungsam (mossy) lam chi a ṭo ṭhin bawk.

Bangor University-a scientist, Paul Hill chuan, "Antarctic hi vûrin a khuh vek ram niin kan hre ṭhin a, nipuiah chuan Antarctic khawmual zingzum (peninsula) leh a chhehvel thliarkarah te hian vur a tuiral a, lungsam chi hrang hrang leh pangpar chi hnih an ṭo ṭhin a ni," a ti.

Antarctic hi khawvel hmun dang zawng aiin a lum chak a, hei vang hian hnimte pawh hi rawn lang ta a ni. Bangor University-a mi vek Davey Jones chuan, "Thlaite hian ṭha taka ṭo nan nitrogen an mamawh a ni. Antarctic tuipui kamah te hian nitrogen hi leia organic matter-ah a awm ber a, khua a vawh ṭhin avangin lei chhungah a ral a, tunah chuan khua a lum tial tial a, thlaite tana ṭo theih turin a rawn chhuak tam tial tial a ni," a ti.