InFocus phone man a tlawm

Phone changkang, man to tak tak si chanchin kan ziak fo a, a nazawng lei theih a ni lo. InFocus-in phone an rawn tihchhuah thar erawh chu i lei ve phak a ni a, a ṭha viau bawk si a, i mamawh a phuhru viauin a rinawm.

InFocus chuan Rs. 4,999 man chauh, phone ṭha si, man tlawm si M2 chu India-ah an rawn tichhuak ve leh ta. A man hi Delhi leh Mizoramah te erawh a inang chiah chiah thei lo tih hria ila. VAT leh service tax te a inang vek lo a ni.

A hmai a hlai lutuk lo a, inchi 4.2 a ni a, a resolution erawh a ṭha pangngai, 1280 x 768 a ni. A processor, a thluak ber hi rualpawl tak a ni a, 1.3GHz quad core mediaTek a ni. 1GB RAM, storage hi 8GB a ni a, microSD slot a awm bawk.

Phone man tlawmah si chuan a thlalakna a ṭha viau. 8MP lai a ni a, a hmalam leh a hnung lam a inang reng a, LED flash a nei ve ve. Selfie nan chuan duhthusam a tling ve ngeiin a rinawm. Android KitKat (4.4) a hmang tawh a, a battery hi 2010mAh a ni. Snapdeal kaltlangin lei tur a awm a, a dum leh var te a awm.