2024 Esports World Cup a zo ta

2024 Esports World Cup (EWC) hmasa ber, July 3 aṭanga Riyadh, Saudia Arabia-ah neih chu nimin, August 25, 2024 khan an zo fel ta. Team Falcons chuan champion lawmman USD mtd 7 an dawng.

EWC-ah hian video games title 22 aṭangin tournament 23 buatsaih a ni a, Mobile Legend bikah hmeichhia leh mipa an tihrang a ni. Prize pool hi USD mtd 60 chuang niin, e-sports history-ah a tam ber ṭum a ni. Prize money hi category pali - Club Championship, Game Championships, Qualifiers, leh MVP Awards-ah ṭhensawm a ni a, Club Championship tan USD mtd 29, Game Championships USD mtd 33. 8, Qualifers atan USD mtd 7.6 leh MVP Awards atan USD mtd 1.1 dah a ni. Event tina MVP hian USD 50,000 ṭheuh an dawng a ni.

EWC hi Gamers8 festival thlakna niin, Esports World Cup Foundation in a buatsaih a ni a, funding hi Saudi Arabia Public Investment Fund in a tum a ni thung.

EWC a audience hip khawm nasa ber chu PUBG tournament a ni a, tourmanent-ah hian top team T1, FaZe Clan, Natus Vincere, TSM, Afreeca Freecs, leh Team Falcons te pawh an tel.

2024 Esports World Cup champion team hmasa ber, Team Falcons hi Saudi esports organisation niin, kum 2017-a din a ni. A dintu zingah hian Mossad "Msdossary" Al-Dossary, 2018 FIFA eWorld Cup winner pawh a tel. Team Falcons CEO a ni mek a ni. Professional esports lama hlawhtlinna lo chang tawh, high-profile player leh coach te lakhawmin, esports media writer-te chuan 'superteam' tia an sawi ṭhin an ni.