Fak Zai top three a chiang

General PYD leh Literature & Publication Board, Mizoram UPC ṭangkawpin an buatsaih, Fak Zai chu August 23, Zirtawpni zan khan top five intihsiakna neih a ni a, top three-ah thlitfim a ni ta.

Final hmachhawn turin zaithiam pathum thlanchhuahte chu - C. Chawngsangzela (N. Chaltlang), C. Lalruatsangi (Dinthar) leh Malsawmzuali (Buhchangphai) te niin, Grand Finale-ah an inlan ang. Shion Lalbiaknunga (Hreichuk) leh Sylvia K. Ramdinsangi (N. Mualcheng) te zinkawng erawh a tawp ta thung.

Mizoram UPC Conference Hall, Zonuamah intihsiakna hi neih ṭhin niin, August 29, Ningani zan dar 8:00-ah Grand Finale neih a ni dawn. Zaithiam pathumte hian music track leh live music hmanga hla pakhat ve ve sain inelna an hmachhawn leh dawn a ni.Kum 2022 khan Pentecost Fak Zai hi a vawi khat nan neih a lo ni tawh a, mipuiin an hlut hle - tun hi vawi hnih neih a nihna chiah a ni.