Infiammi chawl tawh zinga sum lalut hnem ber Michael Jordan
Kum 2003 daih tawh khan infiamna chawlhsan tawh mah se, Michael Jordan hi infiammi hlawhtling a la ni reng a tih theih. Forbes-in infiammi, infiamna chawlhsan tawh zinga sum lalut hnem ber niin a tarlang.
Michael Jordan hi Nike nena an thawhdunna kan hria a, Nike Jordan aṭang hian pawisa tam tak a lalut reng a, mahse hei chauh hian a dinhmun a vawrh kâng lo, sumdawnna tam takah a hming a chher a ni. Mahse Nike nena an thawhdunna tluka hlawkpui erawh a nei lo.
Nike Jordan bik hi nikum chhung khan, kum hmasa nena khaikhinin, za zela 17 zetin an hralh hnem zawk a, chu chu a sum zawng chuan USD tld2.6 zet a ni. Nike mai bakah hian sponsorship deal aṭang sum a lalut hnem ber. Gatorde, Hanes, Upper Deck, 2K Sports leh Five Star Fragrance aṭangtein Jordan hian sum tam tham tak a ṭhâm lut a ni.
Tunhnaia a sum lakluh tipungtu chu media company ṭhenkhatte nen an thawhhona hi a ni. Sports programme tihchhuah kawngah te an thawkho thar. Kum 2014 chhung khan Michael Jordan hian USD mtd100 a hailut. Jordan hian sum a lalut hnem hle a, infiammi, chawl tawh leh la khel mek zingah pawh sum lalut hnem ber dawttu a ni a, sum lalut hnem ber chu Floyd Mayweather a ni a, ani hian kum 2014 chhung khan USD mtd105 a lalut.
Pahnihna chu David Beckham a ni. Kum 2014 chhung khan David Beckham hian USD mtd75 zet a thawk chhuak. Beckham hian futbol a chawlhsan hnu hian sumdawnna kawng hrang hrang a luhchilh nasa lehzual hle. Breitling, Sky Sports, Belstaff leh Adidas te nen kawng hrang hrangah an thawkho a, hei bakah hian nikum khan China-ah Jaguar te nen an thawkho ngar ngar bawk. Kum 2013 February thla aṭang khan Chinese Super League nen inremsiamna neiin, he league tan palaiah a ṭang a, an league tihlarsaktu a ni. China Auto Rental nen an thawkho a, Sands China te nen an sumdawngho bawk.
Beckham-a sumdawnna huang hi a zau hle a ni. A chunga tarlan bakah khian Scotch Whiskey leh Haig Club te nen an inthlunzawm ṭha em em. Hong Kong-a innghat, Global Brands Group te nen deal an nei a, heng bikho erawh hi chu Fuller-a te nena an thawhhona a ni. Simon Fuller hi Beckham-a advisor a ni. Beckham hi sumdawnna tenau tam takah a inrawlh a, a hlawhtling em em.
Sum lalut hnem dangte
Arnold Palmer (Golf) USD mtd42
Jack Niklaus (Golf) USD mtd28
Jerry Richardson (American Futbol) USD mtd23
Shaquille O'Neil (Basketball) USD mtd21
Gary Player (Golf) USD mtd21
Magic Johnson (Basketball) USD mtd20
Pele (Futbol) USD mtd16
Greg Norman (Golf) USD mtd16
Michael Strahan (American Futbol) USD mtd14
Li Na (Tennis) USD mtd13