Khiangte Construction Ṭhazual Lengzem: Guru Gee kan hmu leh ta

A hla pakhat hmanga Mizo rimawi khawvel dengchhuak thei, Guru Gee chuan ama hla phuah ngei hmang bawkin thawm lian tak a rawn nei leh ta a, 'Darbiahnem' chu Khiangte Construction Ṭhazual Lengzem chart tharah pakhatnaah a rawn lanpui. Guru Gee kan hmu leh ta.

Guru Gee hian 'Darbiahnem' hi July 13, 2024 khan a YouTube channel-ah dah chhuakin, million view pawh a nei tling tawh a ni. Music & recording hi Westend Studio-ah tiin, a video hi Osiama Pictures kut chhuak niin, Joshua Constructions sponsor a ni. A thu a ṭhain a thluk a bei nalh a, a satu in a thiam bawk si, a aw 'cial' dangdai tak nen, lung a kuai a, tam tak chuan mittui nen an ngaithla ngei ang.

Mendal x Smiley 'Kum za' chu pahnihnaah an la ding nghet zel, chart-ah pawh hun eng emaw chen an lanpui tawh a ni. Angela Malsawmpari pawhin 'Mi dang tan' tih chu No 6 aṭangin No 3-ah a inhlankaipui a, Projek_Liantluang X Lalhmangaihzuali (nunu-i) Ft. Smiley ' I par dun ang' leh Rinfeli Khiangte 'Ainawnpari' chu Top 5-ah an lang bawk. Rinfeli Khiangte hian Top 10-ah a hla dang, 'Duh te'n ka chawi' tih chu a lanpui thei bawk a ni.

Mizo folk singer kan neih ṭha zinga mi, Marina Vanhriatpuii chu No 6-ah a rawn chho a, ani bakah R. Lalruatkima, Mendal leh 4AM te chu ṭhazual Lengzem Top 10-ah an lang.