Box Office: No 1-ah 'Deadpool and Wolverine' bawk

North American box office-ah 'Deadpool and Wolverine' bawk No 1-ah awm lehin, kar nga chhung No 1 dinhmun a luah thei ta. Kar liam ta khan USD mtd 18.3 hmuh belh lehin, khawvel huapa a sum lak luh hi USD tld 1.2 a tling tawh.

Walt Disney Company film, 'Alien : Romulus' chu No 2-ah awmin, a kar hnihnaah USD mtd 16.2 a hmuh belh ve leh bawk. He film hian USD mtd 225 a hmu chhuak tawh a ni. Disney film dang, 'Inside Out 2' chu No 9-ah a la lang thei bawk a, a kar 11-naah North America-ah USD mtd 2.1 a lak luh belh a ni.

'It Ends With Us' chuan USD mtd 11.9 la lutin pathumnaah a lang a, Blake Lively leh Justin Baldoni channa Sony movie hi USD mtd 25 budget hmanga siam niin, a sum hmuh chhuah hi USD mtd 242 a tling der tawh.

Zoe Kravitz direct, Channing Tatum channa, 'Blink Twice' chuan tlangzarh karah USD 7.3 la lutin No 4-ah a awm a, he psychological thriller hi billionaire Slater King (Tatum) an a private island-a hmeichhe pahnih a rukbo chungchang a ni.

Faith-based drama, mi pakhatin Kristian sakhaw hmanga nunkawng dik a hmuh chhuahna, 'The Forge' chu No 5-ah langin, USD mtd 6.6 a la lut a, CinemaScore-ah pawh A+ a hmu pha.

Film tlangzarh thar, 'The Crow' bakah 'Twisters' te chu top five-ah an lang pha lo. 15th anniversary puala an release nawn, 'Coraline' chuan USD mtd 5 hmuin Top 10-ah a lang ve bawk.