2025-ah Oasis in tour nei dawn

Kum sawm chuang zet an inkar boruak ṭha lo leh inpuhmawhna hrang hrang an neih hnuin, Gallagher brothers - Liam leh Noel chuan Britpop band, Oasis chu inzawmkhawm lehin nakkumah 'Oasis Live 25' tour an nei dawn tih an puang.

August 27 khan band social media kaltlangin tour an neih tur thu hi an puang a, July-August, 2025 chhungin Cardiff, Manchester, London, Edinburgh leh Dubin-ah te concert an nei dawn. Hei bakah hian nakkum kum tawp lam Europe pawn lamah tour hi neih chhunzawm an tum bawk. He tour hi an monumental album, "(What's the Story) Morning Glory?" kum 30 a tlin kum nen a innang dawn a ni. Oasis band hi kum 2009 khan kehdarhin, Gallagher-te unau inkar boruak hi a ṭha lo hle a, mahse hetichung hian fan-te chuan an inzawmkhawm leh beiseina an nei reng a, an beiseina chu tihhlawhtlin a ni dawn ta a ni.