Billboard 200 : Post Malone 'F-1 Trillion' in hma a hruai

Post Malone album thar, 'F-1 Trillion' chuan Taylor Swift 'The Tortured Poets Department' nawr chhuakin, Billboard 200 album chart tharah hma a hruai.

'I Had Some Help' hitmaker, Post Malone country album hmasa ber hi August 16-a tih chhuah a ni a, album chart-ah No 1 album a neih pathumna leh, Top Country Album chart-ah No 1 a nihna hmasa ber a ni bawk. Kar liam ta chhung khan US-ah 'F-1 Trillion' hian equivalent album unit 250,000 neiin, album-a hla 27 te hian on-demand official stream mtd 212.86 an nei bawk. Album sales hi 80,000 a tling bawk.

'F-1 Trillion' album-ah Malone hian country star lar Dolly Parton, Tim McGraw, Hank Williams Jnr, Brad Paisley, Blake Shelton, HARDY leh Morgan Wallen leh midang a thawhpuina telin, album-a hla 18 zinga 15 hi collaborations a ni. Album deluxe version hi tlangzarh nghal a ni bawk a, a solo track pakua dah belh a ni.

Chappell Roan "The Rise and Fall of a Midwest Princess" chu No 2-ah a la ding nghet a, equivalent album unit 72,000 a nei leh. Taylor Swift 'The Tortured Poets Deparment' chu No 3-ah a tla thla thung a, a zawn loin kar 15 zet No 1 dinhmun a hauhpui thei a ni. Kar liamta chhungin equivalent album unit 62,000 a la neih belh a ni. Morgan Wallen ' One Thing at a Time' pawh No 4-ah a tla thla ve bawk a, Billie Eilish 'Hit Me Hard and Soft' chuan Top 5 a khar.