Pentecost Fak Zai - A hmawr bawk a ni dawn ta

Mal zai intihsiakna, Pentecost Fak Zai chu zanin dar 8:oo hian a hmawr bawk a ni dawn ta - Mizoram UPC Conference Hall, Zonuama Grand Finale neihah top three-ten zaithiam ber nih an inchuh dawn.

Fak Zai top 3-ah hian Dinthar nula C. Lalruatsangi, N. Mualcheng tlangval C. Chawngsangzela leh Buhchangphai tleirawl Malsawmzuali te an inel dawn a, mit leh beng a tlai leh ang.

July thla aṭang khan Fak Zai hi neih ṭan niin, Ruatsangi a hmuhnawm a, a zaiin mipui a hneh a,a che vel a hmuhnawm tel. A tir aṭanga Fak Zai en tan Chawnga hmasawnzia hmuh hmaih chi a ni lo a, round tinah a hmasawnna hmuh tur a awm. Malsawmzuali hi la naupang viau mah se, stage-ah a naupanna hmuh tur a awm lo a, a zai lunglenthlak tak hi mipui rilru hnehtu a ni.

General PYD, Mizoram UPC leh Literature & Publication Board te ṭangdunin an buatsaih, mal zai intihsiakna top three-ah hian hla pahnih hmangin zaithiamte an intihsiak dawn a, hla pakhat hi music track nena sak tur niin, hla pakhat erawh live music nena sak tur a ni thung.

Zaninah hian intihsiakna piahlamah zaithiam tak tak an che dawn a, Fak Zai neih hmasaka top three C. Lalhriatkimi, Rebek Vanlalnunpuii leh Vanlalduhsaka te an inlan ang a, Fak Zai judge C. Lalmuanpuii leh tun hnaia MZI chart lama thawm nei reng Gershom Lalṭanpuia Sailo te an zai dawn bawk.

Fak Zai Grand Finale hi Zonet Zawlbuk leh General PYD YouTube channel lamah live-a pek chhuah a ni leh ang.