SBI Life Insurance Little Mizo Champs Vanlalrinsanga a sang

SBI Life Insurance Little Mizo Champs chu nimin khan zawh fel a ni ta a, Ramhlun South rawlthar, Vanlalrinsanga talent-in ngaihhlut a hlawh ber a, a talent a tipung nasa ber kan ti thei ang. Final-a a lâmin lawm a hlawh a, thlirtute mit a tlai.

Chanmari YMA Hall-a buatsaih Little Mizo Champs-ah hian mi 57 lai an tel a, nimin chawhma aṭang khan mi 30 thlan chhuahte an intihsiak a, hemi hnu hian a ṭha zual 15 thlang chhuakin, heng mite hian chawhnu dar 2 aṭang khan intihsiak an neih chhunzawm leh a, Vanlalrinsanga, Ramhlun South chu pakhatna a ni ta a ni.

Pakhatna, Vanlalrinsanga hi a lâm thiam a, a lâm thiamna hmangin pakhatna hi a la, Rs. 15,000 a dawng. Pahnihna hi Eddie Zothanmawia, Chanmari West niin, drums a thiam hle a, naupang tak tak a la ni chungin a talent a ropui hle. Rs. 10,000 a dawng a, pathumna hi Chanmari West tho, Zothanpuii niin, zai hmangin he dinhmun hi a chang a, Rs. 5,000 a dawng. Pakhatna aṭanga pathumnate hian trophy an dawng tel ṭheuh bawk. Palina aṭanga pariatna ten Rs. 2,000 ṭheuh an dawng a, pakuana aṭanga 15-na ten Gift Hamper leh Certificate an dawng ṭheuh bawk.

He intihsiakah hian Rosy K. Remsangpuii, Michael M Sailo leh Allen te judge an ni. Allen hian top 15-a tling chinte Mizo Dance Camp-ah lâm a zirtir nghal ang a, scholarship a pe nghal vek bawk ang.

Rosy chuan talent show chu ṭha a tihzia sawiin, "Naupang tê tê tia kan sawi ṭhin kha a ni a, mahse an naupanna anga en chi an ni lo a, ngaihtuah a, ngaihsak tur a ni. Nu leh pate hian kan fate hi naupang chumchiap anga kan ngaih pawh, an hmalam hun kan ngaihtuahpui a, an talent kan ngaihsak a, kan enkawl uluk a, an kalna tur leh ṭhian kawmte thlengin kan ulukpuiin, kan ngaihsak tur a ni," a ti. "Kum 9 mi lek te pawh an talent ṭhatzia kan hmu a, an talent phochhuahna tur remchang siamsak hi a ṭul a ni," a ti bawk.

Michael M Sailo chuan, "Hetiang talent show hi neih chhunzawm zel chi niin ka hria a, naupangte mai bakah tleirawl zingah talent nei ṭha tak tak an awm a, chung mite chu hun remchang siamsak a, an talent hmanga an hmalam hun an hman theih dan tur ngaihtuahsakna remchang siamsak a ṭul a ni," a ti. Allen-a pawhin hetiang show hi buatsaih leh zel chi nia a hriat thu sawiin, "Lâm bikah natural deuh deuh, hidden talent ka hmu a, a ropui khawp mai. A ṭha ka ti a, an thiamna phochhuahna hun remchang an nei lo ṭhin a, hetiang phochhuahna hun siam hi thil pawimawh leh ṭul tak a ni," a ti bawk.