FB-a komen vangin Cl XI zirlai an man FB-a thu komen fimkhur a ngai

Facebook-a kan komen leh thu kan post-te fimkhur a ngai a, freedom of speech ka nei alawm tih avanga thu pawisawi tak tak tarlan hian midang freedom a tih­chhiat si chuan a pawi thei viau. Tunhnai khan Uttar Pradesh-ah Class XI zirlai pakhat pawh Facebook-a a thu komen avangin an man hmak.

Class XI zirlai, mipa tleirawl pakhat chuan FB-ah hian Samajwadi Party hruaitu, Uttar Pradesh-a Urband Development Minister Azam Khan chu a FB komenah zah lo tak leh ngainep ang rawng kai, huathlala thei tak tur thu a tarlan avangin an man. He zirlai hi Woodrow School, UP-a Bareilly district-a kal a ni a, a hming hi Vicky Khan a ni. Rampur Police-te chuan an la hmak tawh a ni.

Chanchinbuten an tarlan danin Vicky komenah hian SP hruaitu hi zah lo takin a ti a, a nihna lo anga sawiin, community tan pawha ṭha lo lamin a tarlang a ni. A komen avang hian Information Technology Act Section 66A leh IPC hmangtea thubuai siamsak a ni.

Social media hi inkawm­na, titihona tur hmun a nih rualin mi sawiselna na tak tak dah nan hman a pawi thei viau a, dan hriat loh avangin dan a bawhchhiat theih tih hriain kan fimkhur tlan a ngai. Kan rilrua awm apiang tarlan hi a him kher lo.