Jaui 'Lo hnai la' tluk zo an awm lo
Hontrade International Ṭhazual Lengzem-ah pakhatna thar an awm a, chu chu tudang ni loin Jaui 'Lo hnai la' a ni. Manuna 'Ka hmangaih vang' chu pahnihna niin, Dj Lalvenhimi 'Ka dawn lungruk' chu pathumna a ni thung.
Jaui 'Lo hnai la' a mawi Lalramzaui (Jaui) hian nikuma Ṭhazual award semna kha hmang ṭangkaiin 'Lo hnai la' music video tlangzarhna hun atan a hmang nghal a, a ṭumkhatna atan he hla hi a perform nghal bawk. Kum 2018 khan Ṭhazual Award-ah John Hnamte hla 'A pawi lo ve' kha a thlawh fuh hle a, ani hi Ṭhazual award hmangthiam ber zinga mi a ni ngei ang.
'Lo hnai la' hi hla nalh tak tak phuahchhuak tawhtu Lal K. Sailo phuah a ni a, a satu hian a sa thiam bawk a, Ṭhazuala No. 1 a ni pawh hi thil awm tak a ni. Jaui zaithiam zia sawinawn a ngai lo a, performer ṭha tak a nihzia pawh kan hre tlang. 'Lo hnai la' music video pawh hi a hmuhnawm a, amah a zei bawk a, YouTube-ah mi nuai chuangin an thlir tawh pawh hi thil mak a ni lo. Tlangzarh a nih aṭang khan Ṭhazual chart a luahlum nghal chat a, chart hmasaah khan pathumna niin tunah chuan dinhmun ṭha ber a rawn luah ta a ni.
Ṭhazual chart-a ngaihnawm
Chart hmasaa pakhatna Manuna 'Ka hmangaih vang' chu pahnihna a ni ve thung a, Dj Lalvenhimi 'Ka dawn lungruk' pawhin hma sawn zelin, pathumnaah a rawn inhlangkai ve leh bawk.
Top 3 chin hi chu ṭha tura ngaih sa an nih avangin anmahni en mai pawh hian top 3 luah awm reng anni sa. Van Hlei Sung 'I ṭang ka belh lai khan ka hlim zawk si' chu palina a ni a, YouTube lamah a tlaknat zia sawinawn a ngai lo, Teawmi pawhin a hla thar 'Facebook' chu top 5-ah a rawn inhlankai pui ve leh bawk.
Top 5 chin chiah hi an ṭha a ni lo, Rpa ft Rinhlui Pialtu leh rapper RD-i-te pawh Top 10-ah hian an la awm a, Ṭhazual chart top 10-a lang chinte hi an ṭha rual hle a ni.
Hontrade International Ṭhazual Lengzem Top 10
1 Jaui - Lo hnai la
2 Manuna - Ka hmangaih vang
3 Dj Lalvenhimi - Ka dawn lungruk
4 Van Hlei Sung - I ṭang ka belh lai khan ka hlim zawk si
5 Teawmi - Facebook
6 RPA & Rinhlui Pialtu - Lokir leh mai rawh
7 Aziri - Ka thlang ber che asin
8 Marshall Fka ft Lazzy - Kumtluang atan
9 RD - BOLD V.2 (Confession)
10 Ruatsangi Ralte - Ka nuam ngei e