UK-a album hralh hnem ber Queen's Greatest Hits

UK Official Album Chart-in kum 60 a tlin an lawm nan UK-a album tihchhuah tawh, he kum 60 chhunga hralh hnem ber ber tarlan niin, Queen album, Greatest Hits chu hralh hnem ber a ni.

UK Album Chart kum 60 tlin lawmna nipah hian zaithiam hrang hrangten UK-a album an hralh chhuah tawh zat hi tarlan a ni. Queen album, an hla hit deuh deuh an dah khawmna, kum 1981-a an tihchhuah hi UK-a album zawrh chhuah tawh zinga hralh hnem ber a ni a, tun thlengin copy maktaduai 6.1 zet an hralh tawh. He album hi kum 2014 khan UK-a album hralh chhuah tawh zinga copy maktaduai 6 an hralh chhuah tlin hmasak ber a ni.

Queen album dang, an hla hit dang an dah khawmna, Greatest Hits II chu UK-a album hralh chhuah tam ber ber 60 thlan chhuahah 10-naah a lang pha bawk.

Album hralh hnem pahnihna chu Abba album a ni a, an hla chi hrang hrang an khung khawmna tho, compilation tho a ni. Abba's 'Gold: Greatest Hits' kha pahnihnaah a lang a ni.

Top 10-ah hian Queen leh Abba album te bakah the Beatles album 'Sgt Pepper's Lonely Hearts Club Band', Adele album '21', Oasis album 'What's The Story Morning Glory', Michael Jackson-a album ropui 'Thriller', Pink Floyd album hit turu tak 'Dark Side Of The Moon', Dire Straits album ngaihnawm 'Brothers In Arms' leh Michael Jackson album dang 'Bad' te an lang.