Curry (Under Armour) vs. James (Nike)

Tun hnaiah Golden State Warriors guard Stephen Curry-a'n Basket­ball khawvelah ro a rel a, chumiin a ken tel chu sumdawnna khawvela dingchang zawk nih inchuh a ni - kum 1990 chho khan sneaker siamtu lar pahnih Nike leh Adidas te chuan baskteball sumdawnna khawvelah dingchang zawk nih an inchuh a, Nike-in hnehtu nihna a chang.

Vawiin dinhmunah chuan Nike-in Basketball khawvelah Adidas aiin 90% in pheikhawk an hralh hnem zawk a, an vawk lal len - mahse tun hnaiah Curry-a ropuina chhawr ṭangkaiin Under Armour-in an lal ram an rawn zauh ve leh a, Nike nekchhuak thei dinhmunah an ding.

Kum 2009-a Curry-a'n NBA a luhchilh khan Nike hnuaiah contract a nei a, basketball court-ah Nike pheikhawk a bun ṭhin. Kum li chhungin Curry-a'n hmuh theih khawpin hma sawn mah se vawiina a dinhmun ang erawh hliam vangin a luah pha lo, kum 2013 khan Nike-a a contract renew a hun a, kum khatah dollar maktaduai 2.5 hlawh turin American company hian an sawm.

Under Armour an lo lang a, Curry an sawmna zat chu kum khata dollar maktaduai 4 hlawh turin a ni. Nike-in Under Armour ngamna zatin an ngam ve si lo a, Curry an kaltir - Nike-in an thutlukna siam tawh zinga pawi ber zinga mi an siam tih an hre bik lo.

Khelmualah Curry a che ṭha a, khelmual pawn lam sumdawnnaah Under Armour-in a hlawkna an tel thung. Kum 2014-a thla li chhunga an sneaker hralh aṭanga chhutin 2015-a thla li chhunga Under Armour sneaker hralh zat punna chu 95% a ni a, kumin thla li chhungin 64% in a pung leh tawh bawk!

Curry-a hming chuanna pheikhawk Under Armour-in kumin chhunga an hralhchhuah aṭanga sum hmuh an inbeisei zat hi dollar maktaduai 160-a ni a, baskteball khel mek zingah hetiang dinhmun thleng pha an awm lo - Nike nen damchhung atana contract maktaduai 500 man hu ziaktu Lebron James meuh pawhin hetiang zat a la lalut ngai lo. Nike leh Under Armour indona hi Curry leh Lebron James indona a ni tel nghal!

Kum 2010-a Under Armour-in an pheikhawk hralhchhuah aṭang ringawta an sum hmuh let zat chu dollar maktaduai 127 a ni a, kum 2015-ah chuan dollar maktaduai 678 zet an hmu tawh! Nike leh Under Armour hlutna erawh a la inthlau a, Nike hlutna hi dollar tluklehdingawn 90 a nih laiin Under Armour hlutna hi dollar tluklehdingawn 23 a ni thung - mahse Curry a chet ṭhat reng chuan Under Armour hi Nike tan enliam mai mai theih a ni lo ang.