US-ah music hralh a tlem

Digital era hian music-ah a chhe zawngin nghawng a nei nasa a ni ang, US-ah pawh music album hralh a tlem hle. Kum 1991 hnua music album hralh tlem ber kum chu kumin hi a ni.

Album pangngai mai bakah, album tlukpuia an chhiar, music track hralh pawh a tlahniam tho. Album-a awm music track 10 an hralh hian album tlukpuia ngaih a ni. Kumina album an hralh zawng zawng hi maktaduai 100.3 a ni a, kum hmasa aiin 13.6% zetin hralh hi a tlem zawk. CD-a hralh a tlahniam ber a, CD-a album hralh zawng zawng hi maktaduai 50 vel a ni a, kum hmasa aiin 11.6%-in an tlahniam.

Digital album pawh nikum kum chanve hma lam nena khaikhin chuan hralh a tlem hle. Nikum January aṭanga June thla chhung khan digital album maktaduai 53.7 zet an hralh laiin, kuminah erawh chuan maktaduai 43.8 chauh an hralh tawh a ni. Vinyl erawh a ziaawm a, 11.4% in kumin kum chanve chhung hian an hralh hnem tawh thung a, an hralh tawh zawng zawng hi maktaduai 6.2 a ni.

Music track hralh pawh a tlem zawk. Nikum thla ruk chhung khan maktaduai 531.6 an hralh a, kumin thla ruk chhung erawh chuan maktaduai 404.3 an hralh a ni.

Streaming lamah erawh chuan hma an sawn thung. Kumina hla an stream zawng zawng hi tluklehding≠awn 208.9 a ni a, chu chu album tlukpui ang chuan album maktaduai 139.2 ang a ni a, nikum aiin 58.7 ngawtin a pung zawk. Music an stream hian, tluklehdingawn 113.6 hian audio chauhin an stream a, video streaming hi tluklehdingawn 95.3 a ni (YouTube, Vevo, Tidal leh Apple Music te pawh a huam).

Album hralh a tlakhniam rual hian music aṭanga US-a pawisa hmuh chhuah hi nikum aiin a sang. Nikum khan USD tld 1.82 a nih laiin kuminah chuan USD tld 1.98 a ni a, a punna hi 8.9% a ni. Sum hmuh tipungtu ber chu streaming hi a ni.