10,000 Reasons - tunlaia hla thiltithei

Contemporary Christian music ngaithla ṭhin te chuan he hla hi an hla duh berte zinga mi a ni ngei ang. Britain-ah phei chuan, kum 2013 khan worship music zinga mite duh ber a ni hial. He hla hi a mawi mai bakah a hla thu ṭha; mahse chu chu a tawpna chauh a ni lo, khawvel pumah he hla hian mite thinlungah thu a sawi a, mi tam tak chu nunna kawngah a hruai a ni.

10,000 Reasons hi Jonas Myrin leh Matt Redman te phuah a ni a, kum 2012-a Matt Redman-a album, 10,000 Reasons hming putu hla a ni. He album hi kum 2011-a tihchhuah a ni. Hemi kum hian Top Christian Albums-ah pakhatna a hauh a, kum 2012 pawh khan Top Christian Albums-ah pakhatna bawk a ni. Billboard Album chart-ah chuan 10,000 Reasons album hi 60-na lai a thleng pha.

A hla mal hian kum 2012 khan (single-in) tihchhuah a ni thung a, Billboard US Christian Songs chart-ah pakhatna a ni nghe nghe. '10,000 Reasons (Bless the Lord)' hi Sam 103-a innghat hla a ni. He hla hmang hian Matt Redman leh Myrin te hian Grammy Awards-ah Best Contemporary Christian Music Song leh Best Gospel/Contemporary Christian Music Performance category te an la hial a ni.

Indonesia khi ruih≠hloa sumdawngte hremna dan nei na berte zinga mi a ni a, khawngaih tak chungin an tihlum mai ṭhin. He rama khaw lar tak, firfiakte pawhin bomb hmanga an beiha mi tam tak an lo thih tawhna hmun Bali-ah Andrew leh Myu te chu ruihhloa an sumdawn avangin man an ni a, kum 10 an tan hnuah kahhlum tur an ni. An thih hun a hnaih tawh lamah he hla '10,000 Reasons (Bless the Lord)' hla hi an ngaithla fuh hlauh mai a, chu chuan nunna thar a pe a ni. Tichuan kahhlumna tualah an dah chhuak a, an mit an tuamsak lai, anmahni kaphlumtutena an tin ṭhup laiin, he hla hi an sa a -

"And on that day when my strength is failing, the end draws near and my time has come. Still my soul will sing your praise unending, ten thousand years and then for evermore."

an sak lai chuan an kap≠hlum ta a ni.

Reuben Hill chu London-a Imperial College-a physics subject-a PhD zir mek a ni a, hmalam hun beiseina sang tak a nei a, a nun a hlim chhoh em em laiin a thluakah chawr a awm tih an hmuchhuak tlat mai. Tichuan Charing Cross Hospital-ah thiam≠ na thar ber hmangin an zai ta a ni. A thluaka chawr awmna lai hi ṭawng chhuah lam thununtu awmna lai a ni a, an zai laklawh laia kaihthawh a, a ṭawng hriatna leh theihna lamah harsatna a tawh phah leh phah lo fiah a ngai a ni. Tichuan an kai tho a, he damdawi ina speech therapy chuan zai turin a hrilh a, chutah he tlangval, kum 22 mi hian -

"Whatever may pass and whatever lies before me, I'll still be singing when the evening comes"

tiin, Matt Redman-a hla '10,000 Reasons (Bless the Lord)' chu a rawn sa chhuak a ni. He thu hi BBC pawhin August 26, 2015 khan a tichhuak nghe nghe.

Matt Redman hian a hla '10,000 Reasons (Bless the Lord)' hla hmanga Pathianin hna a lo thawh tawh dan hrang hrangte ziakin lehkhabua chhuah a tum a, July 22 aṭang hian zawrh chhuah ṭan a ni ang. Redman hi British Kristian zaithiam a ni.