Streaming-ah Drake a hlawk ber

Billboard album chart-ah pawh a zawnin vawi kua zet pakhatna a ni tawh a, pakhatna a nih theihna chhan lian ber chu streaming equivalent album a ni.

Hman deuh lawk aṭang khan Billboard hian album hralh an chhiarah streaming equivalent hi an telh thar a, an telh hnuah Drake hian a hlawkpui ber mai.

Drake album 'Views' hi streaming equivalent album-ah chuan copy 979,000 zet hralh tawh ang a ni. Miin vawi 1,500 a stream hian album pakhat hralh tlukah chhiar a ni. He album hi a pangngai ang chiin copy maktaduai 1.3 an hralh tawh a, track equivalent album-ah copy 317,000 a hralh tawh bawk. Album pangngai hian kumin Adele hian a album 25 kha copy maktaduai 1.4 a hralh tawh a, Beyonce hian copy maktaduai 1.2 a hralh tawh thung.

Hla mal hralh chhuahah chuan Drake aiin Flo Rida a chungnung zawk. Flo Rida hla 'My House' chu kumin chhungin copy maktaduai 1.95 zet an hralh tawh a, hla mal, kumin chhunga maktaduai khat chuang hralh theih hla 16-ah a tel pha hial a ni. Nikum kha chuan hla mal, copy maktaduai khat chuang hralh theih hla 27 lai a awm a, heng zinga hla paruk phei chu maktaduai 2 aia tam an hralh hial.

US-ah hian miin album an leina hmun hi digital retailer aṭangtein a ni. Album hralh chhuah zawng zawng zinga zaa 43.7 chu heng dawr aṭanga hralh chhuah hi a ni. Hetihlai hian Amazon leh supermarket aṭangtea hralh chhuah hi 8.3%-in a pung.