Synfo-in solo intihsiak a buatsaih dawn

Synod Information and Publicity Department chuan Mizoram chhunga KṬP branch hrang hrangte inelna turin solo intihsiak, 'Praise On' a buatsaih dawn. He intihsiaknaa tel turte chu KṬP branch aiawh tur an nih dawn avangin mimalin a tel theih dawn loh a ni.

Aizawl, Lunglei, Serchhip, Champhai, Mamit, leh Kolasib District-ah te audition round neih a ni ang a, heta tlingte hi Aizawlah an intihsiak chhunzawm zel dawn a ni. Audition round-ah hian hla chang thum emaw, chang hnih leh a thunawn emaw sak tur a ni.

July 30 thleng hian tel tumte tan hming pek theih a ni ang a, audition round hi Champhai leh Lungleiah chuan August 12-ah neih tur a ni a, Serchhip, Kolasib leh Mamit-ah chuan Aug. 16-ah leh Aizawlah chuan Aug 19-20-ah te neih a ni ang. Intihsiaknaah hian Pakhatnain Rs. 80,000, Pahnihna Rs. 40,000, Pathumna Rs. 20,000 leh Consolation Prize (Top Ten tling chin) Rs. 5,000 an dawng dawn a ni.