Black Panther actor Chadwick Boseman a thi

He thu lungchhiat thlak tak hian Inrinni (US-ah chuan Zirtawpni zan) liam ta khan khawvel a deng chhuak a, a bikin film indus­try a ngui a, lemchan thiam hming­thang Chadwick Boseman chuan Zirtawpni khan khawvel a lo chhuahsan reng tawh mai a ni. A dam loh thu khawvelin a hre lo a, a thih thu hian khawvel a barakhaih a ni ber mai. Black Panther actor hian hun rei tak chhung a hmelma, colon cancer chu a beih hnuah hnehna a chang ta lo.

Chadwick Boseman thih thu puanzar a nih hnu lawkah hian internet lamah chuan a uina thu chhiar tur a tam hle a, Black Panther leh Avengers lama a chanpuite bakah milar tak takin an uina, thlahna thu mawi tak tak ziakin an tarlang nasa hle. 

Black community lamin an ui zual a, black celebrity kumin chhunga nunna chan an awm ta zeuh zeuh bawk nen an ui zual hle a ni.  'US Weekly' chuan a thihna hi 'most shocking celebrity deaths of all time' tiin a tarlang. (Naya Rivera leh Bryant thinna pawh kha hetiang hian a lo tarlang tawh).

Boseman thih thu hi a official twitter account kaltlangin a chhungten an tarlang a, hei hi khawvela twitter-a tweet awm tawh zawng zawnga 'like' ngah ber niin nimin thleng khan mi maktaduai 6.5-in an 'like' tawh a ni.

Chadwick Aaron Boseman hi November 29, 1976 khan Anderson, South Carolina, U.S-ah a piang a, a thih hian kum 43 mi a ni. 

Kum 2003 khan lemchan khawvelah inlan ṭanin 'Third Watch' episode-ah a inlan a, hemi hnu hian TV series hrang hrangah a inlan zui a, kum 2008 khan 'The Express: The Ernie Davis Story'-ah inlanin hemi hnu aṭang hian movie lar tak takah inlan zuiin lemchan khawvela mi hriat hlawh ber zingah a inhlangkai ta a ni.

Kum 2016 khan lemchan khawvela a hming dai leh ngai tawh lo turin 'Captain America: Civil War'-ah 'T'Challa / Black Panther' lemah a rawn inlan a, Marvel Cinematic Universe-ah mi pawimawh tak nih chhunzawmin 'Black Panther' chanchin sawi rik a nih chhung chuan Boseman-a hming hi theihnghilh a ni ngai tawh lo ang.

"Sawi chhuah thiam rual loha lungngai chungin Chadwick Bose­man a thi tih kan rawn tichiang e. Chadwick khan kum 2016 aṭangin stage III colon cancer a vei a, kum li liam ta chhung khan chu natna chu sualin stage IV-ah a kai zui bawk. Mi tuarchhel diktak a ni, Chad­wick khan a dam chhung zawng khan chu chu a hlen chhuak, in film ngainat tak takte kha a hmuhtir che u a ni. Marshall aṭanga Da 5 Bloods, August Wilson's Ma Rainey's Black Bottom leh a dangte, khang zawng zawng kha chemeotherapy leh inzaina chhiar sen loh hmachhawn chunga a chan vek  a ni.

Black Panther-a King T'Challa a taka rawn chantir kha a zinkawnga chawimawihna a ni tak meuh e. A chenna inah a boral a, a nupui leh a chhungkuate'n an dawm hlum. A chhungte chuan in hma­ngaihna leh in ṭawngṭaina vangin lawmthu an hrilh che u a, he hun harsa tak an hmachhawn chhung hian an mimal nun zahsak turin an ngen bawk che u a ni."

Kum 2016 khan stage III colon cancer a nei tih hmuhchhuah a ni a, mahse khawvel hriatah a puangzar lo. MCU lama an boss-te pawhin a natna vei hi an hre lo.

Khawvelin a ṭih em em natna vei chung hian khawvelin hmuhnawm a tih tak tak film a la chang zui reng tho. MCU-a a inlanna film zawng zawng kha cancer natna vei chunga a chan vek a ni a, 21 Bridges, Da 5 Bloods, Ma Rainey's Black Bottom leh Marshall-te pawh kha cancer natna sual chunga a chan a ni. Heng film a chan chhung hian natna na tak a tuar reng a, mahse tumah a hrilh lo. Mi dimdawi bik nih a duh loh vangin a lemchan puite pawhin natna a tuar tih hi an hre lo a ni.

Kum li liam ta chhung khan chemeotherapy a la reng a, vawi duai lo inzaipui a hmachhawn bawk, A tawpah erawh a dawl zo ta lo a ni.

•    Film sum hai lut tam pakuana.

•    Kum 2018-a film sum lalut tam ber dawttu a ni.

•    Oscar award pathum-  Best Costume Design, Best Original Score, leh Best Production Design-te a dawng.

•    Superhero film zinga Best Picture nomination hmu hmasa ber a ni a, MCU film academy award dawng hmasa ber a ni bawk.