Shawn Mendes 'Wonder' album US-ah an ngaithla nasa ber

Billboard 200 chart-ah Camila Cabello duhlai Shawn Mendes album thar 'Wonder' chu pakhatna a ni a, US mipuite'n Shawn Mendes album thar hi an ngaihlu hle a ni. Chutihrual erawh chuan Krismas a hnai chho ta bawk a, Billboard 200 chart top 10-a album panga ngawt chu Krismas album a ni thung. Khawthlang lamah chuan Masi boruak a lian tawh hle tih a hriat theih.

'Wonder' hi Canadian singer Shawn Mendes studio album palina a ni a, December 4 khan Island Records kaltlangin a tlangzarh a ni. Album a tlangzarh hma hian single pahnih a tichhuak hman a, October thla khan a title track 'Wonder' chu lo tichhuak tawhin a Canadian pui Justin Bieber nen an thawhdunna hla 'Monster' chu November khan a tichhuak leh bawk.

Album a tlangzarh ni, Decem­ber 4 khan 'Call My Friends' chu single-in a tichhuak leh a ni.

Rolling Stone magazine-in an tarlan dan chuan 'Wonder' hian Equivalent album unit 107k a hmu chhuak a, heta ṭang hian 52.5k chu album sales niin 11.6k chu song sales a ni a, a album-a hlate hi US-ah chuan vawi maktaduai 41.7 an stream bawk.

Chart hmasaa pakhatna Bad Bunny album record ṭha tak siamtu 'El Ultimo Tour del Mundo' chu pahnihna a ni a, Ariana Grande album thar, chart topper pawh lo ni tawh 'Positions' chu pathumna a ni thung.

America lamah chuan Krismas hla an ngaithla nasa hle tawh tih a hriat a, Billboard 200 chart top 10-a album panga lai chu Krismas album a ni. Michael Buble 'Christmas' chu palina a ni a, Carrie Underwood album 'My Gift' chu pangana a ni bawk.

Nat King Cole 'The Christmas Song' chu pasarihna niin Krismas dawn apianga rawn invawrh ve ziah Pentatonix chuan an album 'The Best of Pentatonix Christmas' chu pariatna an nihpui a, Top 10 khartu chu Mariah Carey album 'Merry Christmas' kha a ni.

Billboard 200 chart top 10:-

1    Wonder    Shawn Mendes

2    El Ultimo Tour del Mundo    Bad Bunny

3    Positions    Ariana Grande

4    Christmas    Michael Buble

5    My Gift    Carrie Underwood

6    Shoot For The Stars Aim For The Moon    Pop Smoke

7    The Christmas Song    Nat King Cole

8    The Best Of Pentatonix Christmas    Pentatonix

9    Good News    Megan Thee Stallion

10    Merry Christmas    Mariah Carey