Fashion Fiesta

Kum dang ang bawkin March vau thla a lo thlen meuh chuan, Zoram chhunga incheina ngainatute leh fashion-a tui mite hmaih phal loh leh nghahhlelh em em, Fashion Fusion kan hmang leh dawn ta reng mai. Inpuahchahna pawh a kal mup mup reng a, kar hnih khat lek ni mai loin thla 3/4 kal ta aṭanga inbuatsaih an nih avangin a hmuhnawm leh viau turah ngai ang. Fashion Show satliah lo tak mai leh Zoram chhunga dan anga kum tina neih awm chhun a nih vang nge, ṭhalai lam pawhin an hlutin kan nghakhlel tlang a ni ber mai. Fashion Fusion chu eng nge ni a, tute buatsaih nge??!!

Zoram ṭhalaite mahni kut ke ngeia ding tura duhsakna avang leh incheina khawvelah hma kan sawn chhoh tak em avanga ṭhalaite thiamna inthup, mithiam zawkten an lo tawn hriat toh aṭanga tuaihriamsak duhna nen, he institution, Vakiria Institute of Fashion Technology hi din a ni a. 2010 daih tawh khan he institution-a zirtirtu leh a neitute ṭangkawpin zirlai tam vak lo, chawhma lam leh chawhnu class kal ṭhinte chu an thiamna leh an hnathawh ṭhenkhatte phochhuahna hun an buatsaihsak a. A kum hmasa berah hian Electric veng YMA Hall-ah ropui taka buatsaih a ni a, pawn lam mi, zirlaite thawmhnaw endik turin Aizawl puanṭhui hlun tawh tak mai, Dawli leh kan designer chhuanvawr Muanpuii Chinzah leh Nift chhuak Maria te endikna hnuaiah zirlaiten thawmhnaw nalh tak tak an phochhuak a. 2011-ah erawh Aijal Club lamah show hi buatsaih niin, zei takin Saizikpuii Sailo chuan a host a, mumal tak leh felfai taka he show hi kalpui niin, hun reilote chhungin thawmhnaw design dangdai tak tak hmuh theihin an rawn pho chhuak.

Kum 1 a lo vei meuh chuan Zarkawt Recreation Centre-ah, a tam zawkina Basketball court tia kan hriat lar, tualzawl thengthaw nuam tak maiah hian, van boruak thiang tak leh arsi pe tuar karah model nalh tak tak ten kawr mawi tak tak an rawn phochhuah chu a mawi dangdai hle. A hnu kum khat a liam takah erawh chuan Chanmari YMA Hall lamah he show awm tirh aṭanga model tam ber ṭum ni turin ramp sei takah nula pian nalh tak tak an inlan a, mit a tlai hle. Nikum lamah erawh Ramhlun Indoor Stadium-ah neiin, a hmun lian lutuk lem lo mah se felfai tak leh mi tam lutuk lo hmah thawmhnaw nalh tak tak hmuh theihin an rawn inbel chhuak leh a, hemi ṭum hian ṭum danga tih ngai loh angin red carpet buatsaih a ni a, Mizoram chhunga designer larte leh he show hluttu zaithiam lar tak tak te, zirlai kalchhuak tawhte kawmna hun hman a ni nghe nghe.

Kum tinin a hmun leh ni thlak zeuh zeuh ni mah se, a tir têa kaldanphung neia he show hi buatsaih a nih miau avangin kum tinin a hma kum December aṭangin zirlaite inbuatsaihna kalpui a ni ṭhin. Kum a lo thar meuh chuan class pangngai ang ni tawh loin show atana ṭhui ngei ngei tur, top leh puan, Jacket leh kekawrtlawn, gown, Mizo puan hmanga thawmhnaw siamchhuah te hmangin inelna neih a ni ṭhin a. Heng piah lamah he show tihlawlhtlingtu pakhat Fashion Fusion tih hming a putna chhan pakhat Fusion wear, zirlaite thiam thil phochhuahna ni pahfawmin leh midang aia an danglamna tihlanna ṭha tak, zirtirtu lam aṭanga theme thlan leh anmahni mimal theme hmang kawpin kawr an siamchhuak ta ṭhin a. Kum tin he fusion wear atan hian theme hrang hrang neih ṭhin niin, kumin bikah history of fashion hmangin inelna buatsaih a ni dawn nghe nghe. Heng piahlamah hian an incheina thawmhnaw timawi zual turin BDA, Champhai lam chhuak, music video-a Pantei lo chei tawhtu leh Miss Mizoram 2014 kuma Champhai lam lo buaipuitu, kut themthiam zet mai chuan kan nulate hi a chei dawn a, hmuh a chakawm lehzual ngawt mai. Endiktu lam pawh designers hlui thei lo - Numami, Magic 'n' Creations, Lunglei lam te; Papuia, designer tuna VSE Chaltlanga instructor ni mek te leh Judge of Honor kan tih mai, Dawli te an ni a. Awards chi nga lai mai awmin heng category hrang hrangah te inelna neiin, tu collection nge nalh ber, tunge a chei leh eng ilo thiam ber, tu ṭhui nge dak ṭha ber, tu idea nge dangdai, tihah te inelna an nei ang a, a hmaa an mark lo khawl tawh sa te nen, heng awards te hi an inchuh dawn a ni.

Kum dang ang lo takin sawm bikte tan chauh ni loin mi vannei bik te leh min hlutsaktute tan ticket siam a ni dawn a. He show chhim duh leh min hlutpuitu te te emaw, a chhim ve chak hrim hrim tan heng ticket te hi buatsaih a ni. Ni 27th Zirtawp zan dar 8 ah Lalthanhawla Auditorium-ah Fashion Fusion en turin lo inbuatsaih la, kan inhmu ngei dawn nia.

Tluangpuii Hmar
Instructress
Vakiria Institute of Fashion Technology