Entertainment Show 'LENLAI' zanin aṭangin

Zonet lama kan hmuh ṭhin 'Lenlai' entertainment show kha zanin aṭangin a thlir leh theih tawh dawn a, Doordarshan lamah kan hmu tawh thung dawn.

Lenlai show producer leh host zei tak Mali Hlondo bawkin he show hi a rawn buaipui leh dawn a, a ngaihnawmin a hmuhnawm leh dawn tih a chiang. Zonet lama kan lo experience tawh ang deuh tho khan show hi kalpui a ni dawn a, mahse a hma ai khan tualchhung milarte chanchin kan hmuin kan ngaithla hnem dawn. Khawvel pum milarte leh tualchhung milarte chet velna ngaihnawm i ti a nih chuan zanina Mali Lenlai show hi lo en phawt mai teh.

Milarte mai bakah mi hlawhtlingte pawh bihchian an ni ṭhin dawn. Chumai a la ni lo, kan zaithiamte an inlan ṭhin dawn a, an live performance hmuh tur a awm ṭhin bawk ang.

Zanin bik hi kumin chhung recap atana hman a ni dawn a, Krimas zan leh kum thar zanah special programme a awm dawn bawk.

Lenlai show hi Zirtawpni zan apiangin dar 7:30-8:00 inkarah tihchhuah a ni ṭhin dawn a, zanin hi a bulṭanna tur niin he show atan hian Mali hian MzSRLM a thawhpui a, MzSRLM lam hian an sponsor a ni.

Season khat tihchhuah a ni phawt dawn a, episode 15 a awm ang. Zaninah hi chuan Mizo milarte inneih thlalak vel kan hmu dawn niawm tak a ni. He show-a wardrobe hi RB Impression an ni dawn a, anni hian mizo traditional based print ho an pho chhuak ṭhin dawn.