Michael B Jordan-in DC 'Static Shock' a produce dawn

Marvel lamah sulhnu ṭha tak a hnutchhiah hnuah 'Black Panther' film-a misualpa Erik Killmonger lema chang Michael B Jordan chuan DC Comics lam a hawi ve dawn thung a, DC Comics movie 'Static Shock' a produce dawn.

'Static Shock' hi DC comic chhiar ṭhinte chuan an hmelhriat furin a rinawm a, rawlthar pakhat Virgil Hawkins, gas mak tak a hip luh vanga electromagnetic power nei ta chungchang a ni a, kum 33 mi Jordan hian a Warner Bros.-a a production company Outlier Society kaltlangin Reginald Hudlin nen an produce dun dawn a ni.

Thuchhuah a siamah Jordan chuan black superhero thar film siamna tura a tel ve thei tur chu a inchhuang tih sawiin, an community (black community) chuan chutiang chu a phu pawh an phu hle tih a sawi.

'Static Shock'-ah hian  Jaden Smith chu a changtupa ber tura sawi thawm a awm a, hei erawh thu chiang a la ni lo thung.

DC Extended Universe hnuaiah hian film chhuah tur a awm nual a, 'Wonder Woman 1984' chu kumin kum tawp lamah hian theatre-a an chhuah hman a rinawm a, 'The Batman' pawh production kalpui mek niin 'Suicide Squad 2' -te pawh kan hmu thuai dawn a, DCEU fan-te'n an phut chhuah 'Justice League: Zack Snyder's Cut' pawh nakkum lamah chuan kan en hman dawn bawk a ni.