'Kan khua'-in million view a nei rang ber

Rebecca Lallawmsangi Krismas hla thar 'Kan khua' chuan record thar siamin Mizo music video zinga YouTube-a million view nei rang ber a ni.

'Kan khua' hi December 8 khan Rebecaa-i hian YouTube-ah a dah a, a hit nghal hle. Kawi tinah an play nghal emaw tih mai tur a ni a, kar khat chhung lekin thlirtu maktaduai chuang a nei hman der.

He hla hi khaw hrang hrangah an play nasa a, nimin thleng khan mi mtd 1.09 velin an thlir tawh a ni. Peka Fanai hla phuah hi a satu hian a sak thiam bakah lam rem tak a lo ni bawk nen, tunhnaia Mizo hla tihchhuahah chuan a aia hit a awm lo a tih ngam. 

Daama Chawngthu kut chhuak music video a hmuh­nawm a, Rebecca-i a lo zei bawk nen, a hit hi a mak hran lo khawp mai.