China > North America

China aṭanga inṭan hripui lengin khawthlang lam a luhchilh a, China angin a chhuahsan ve leh mai si lo a, chu chuan nasa takin khawthlang lam ram a nghawng a, sector hrang hrangah nasa takin an tuar phah a, entertainment industry pawh zuah a ni bik lo. Chutiang boruak lengvel avang chuan tun dinhmunah chuan khawvela Box Office lian ber ni ṭhin America chuan a dinhmun chu a luah reng thei ta lo a, khawchhak lam milian chuan khawvela movie Box Office lian ber nihna chu a rawn hnehchhuh ta a ni.

Asia khawmualpuia film leh cinema industry consulting firm lian Artisan Gateway-in data a tihchhuah aṭanga a lan dan chuan kumin chhunga China-a movie ticket sales chu Pathianni thleng khan $tluklehdingawn 1.988 a ni tawh a, North America-ah chuan $tld 1.937 niin a lehpel ta a ni. Tunah chuan khawvela Box Office lian berah China official-in a pawm theih tawh.

Khawthlang media lian hrang hrang pawhin source atana an hman nasat The Hollywood Reporter chuan US aiin China-ah movie market a lian tawh zawk tih hi official-in a pawm theih tawh thu an tarlang a, mi thiamte chuan kumin kum tawp lamah phei chuan China leh US inthlauhna hi a tam lehzual tawh dawn niin an sawi bawk.

Zir mite chuan engtikah emaw chuan khawvela mihring tamna ber ram hi global chart-a a chungnung ber an la nih hi an ring sa tawh hrim hrim a, mahse tun anga hma hi chuan a nih an ring bik lo. Hripui chu leng lo se China hian America hi an la pha lo hlein a rinawm a, mahse tunah chuan America rama theatre tam tak khar a la nih vang maia chungnung zawk an ni rih. Motion picture sumdawnna bulṭan a nih aṭang khan America hi chu a bupui a ni nghal hrim hrim a, boruak a muanawm hunah erawh chuan China ai chuan an sang leh thuai ang tih erawh a rinawm.

China-ah hian October 1-8, national Day holiday, lai khan ticket $maktaduai 586 man zet an hralh a, an ram film My People, My Homeland chuan kar tawp liam ta pawh khan  $mtd 19.1 lai a lalut a, ni 18 chhung lekin $mtd 360 a lalut tawh a, hei hian China movie market theuneu lohzia a tilang chiang awm e. China aṭang hian kumin chhunga film lian ber zinga mi WWII epic The Eight Hundred pawh tihchhuah a ni a, hei pawh hian $mtd 460 a lalut tawh. Hetihlai hian Hollywood lamah chuan Sony film  Bad Boys for Life kha kumin chhunga film lalut tam ber niin $mtd 426 a lalut.

Hetiang hi tuna China dinhmun ni mah se nakkum lamah erawh chuan hri lengin ziaawm lam a pan chho a nih chuan North America lama movie market hi par vul leh hle ngei dawn niin a lang thung a, kumin chhunga film budget lian tak tak tlangzarh tura an tihte chu nakkum lam atan an hnawh khawm hlawm a, hemi vang hian North America theatre-te pawh an la lun chho leh hle ang tih erawh thil chiang a ni.