Fak Zai - Dinthar nula C. Lalruatsangi tluktu an awm lo

Mal zai intihsiakna Pentecost Fak Zai chu a hmawr bawk a ni ta a, Ningani zana Grand Finale inelnaah Dinthar nula C. Lalruatsangi chu pakhatnaah puan a ni.

Fak Zai hi General PYD leh Literature & Publication Board, Mizoram UPC-in an kohhran huang chhunga zaithiamte inelna atana a buatsaih a ni a, July thla aṭang khan ṭanin, a tawpah chuan Ruattei a dingchang ta ber.

Mizoram UPC Conference Hall, Zonuama Grand Finale-ah hian hla pahnih ṭheuh sain top three-te an inel a, hla pakhat hi music track nena sain, pakhat erawh live music nen a ni thung.

Ruattei hian 'Seol thim hnuai' tih hmanga bul ṭanin, live music nena Mizo legend Rodingliana hla, 'Sual Vanga lungngaiin,' tih a sak chu a pui hle - a zai a ngaihnawm a, stage-a a che vel a hmuhnawm tel. Pahnihnaah N. Chaltlang tlangval C. Chawngsangzela thlan a ni a, Rev. Liangkhaia hla, 'Thisen hlu, thisen hlu,' tih a sak chu ngaihthlak nawn fo tlak a ni. 'Ka lawm zel dawn' tih a sak pawh mawi tak a ni. Fak Zaia tel zinga naupang ber, kum 15 mi Malsawmzuali chuan 'Min thlen ang che' tih leh 'Ka chenna thlaler ram zauah hian' tih hla a rawn sa a, Buhchangphai tleirawl zai lunglenthlak tak hian ngaihven a hlawh zui zel ang.

Pentecost Fak Zai hi vawi hnih neih a nihna a ni a, Grand Finale-ah hian neih hmasak zawka top three C. Lalhriatkimi, Rebek Vanlalnunpuii leh Vanlalduhsaka te an zai a, judge C.Lalmuanpuii leh zai thiam hming chher thar Gershom Lalṭanpuia Sailo te an zai bawk.

Pentecost Fak Zai Result

Pakhatna - C. Lalruatsangi, Dinthar

Pahnihna - C. Chawngsangzela, N. Chaltlang

Pathumna - Malsawmzuali, Buhchangphai