Vanglaini Bihchianna: Entrepreneur Huang : LT Eco Bag

LT Eco Bag hi environmentalist Vanramchhuangi (Ruatfela nu) din niin, environment kohna a dawn hmanga a siam a ni. Leilunga chhiatna nasa tak thlentu, hman khat daih plastic/polythene bag tih bo a, ṭawih thei hmanga a thlakna siam tura a hmalakna a ni.

Bul ṭan dan :

Ruatfela nu hi Mizoram sorkar hnuaia Planning & Implementation Department-a "Mizoram State Entrepreneurship Development Monitoring Committee" (MEDMOC) in Micro Start Up competition a siam vawi hnihna, kum 2018-ah khan LT Eco Bag hmang hian a tel ve a, winner zingah a tel a ni. Hemi ṭum hian tel thei tura kum bithliah chu kum 1 chiahin a pel lo.

Winner-ten bul ṭanna tur Rs nuai 5 an dawn hmangin paper bag a siam a, a tirah chuan khawl pawh hmang loin kut vekin a siam ṭhin. A hnuah loan lak belhin, a ṭhiante nen ṭangkawpin khawl lian an chah chhuak a, he khawl hmang hian kum 2019, August 19 aṭang khan eco bag hi an siam chhuak ṭan.

Khawl lian hmanga bag an siam ṭan chhoh lai hian Aizawl Municipal Corporation (AMC) in hman khat daih polythene/plastic khapna khauh taka a kenkawh chhoh avangin an hralh chhuak nasa a, ni khatah Rs nuai 2 man hralh changte pawh an nei. Mahse a hnuah khapna hi kenkawh mumal a nih loh tak avangin, an bag siam lawk tam tak chu hralh loha vawiin thlenga dahkhawl an la nei niin Vanglaini a hrilh.

Thil siam :

Tunah hian file folder, nursery pot, biodegradable bag (Dcut & Wcut) leh biodegradable garbage bag te an siam chhuak. Hei bakah hian rei tak hman nawn theih puan bag, mipa ipte pui te pawh an siam bawk. An bag siamah hian print duh tan an print sak thei nghal bawk a ni.

Nursery pot an siam pawh hi laboratory-ah enchhin vekin, thla hnih chhungin a ṭawih ral thei tih pawh an finfiah a ni.

Thawktu :

Thawktu hi a nghetin mi pahnih chhawr a nei mek a, thla biin hlawh a pe a ni. A ngheta chhawrte bakah hian order an hmuh hnem dan azirin, thawktu hi daily angin a chhawr belh ṭhin a, ni khatah Rs 500 an hlawh.

Semchhuah dan :

LT Eco Bag hian an thil siamte hi dawr leh hmun dangah an zuar chhuak hran lo. Order an hmuh ang an siam a, hei hi an deliver thei nghal zel a ni.

An thil siam chhuah zingah File folder hi order an hmu ṭha ber a, UGC in plastic a khap vangin zirna in, college hrang hrangten an dawr nasat thu Ruatfela nu chuan a sawi. Hei bakah office ṭhenkhat pawhin an dawr ve bawk. Folder hi a ṭhuina khawl hran neiin, print duh an neih pawhin an lo print sak nghal thei zel a ni. Kohhranten khawmpuina atan an dawr ve ṭan tih a sawi bawk. Puan hmanga bang an siam hi sorkar pawhin training bag atana hmangin an dawr ve ṭhin bawk.

Election Commission of India-in flag siamna atana ṭawih thei hmang tura a tih avangin inthlan dawnah khan political party-ten flag siamtirin an dawr nasa hle tih a sawi.

Hmachhawp :

A bul ṭanna, paper bag hi siam chhoh zel a tum. Home hrang hrangahte pawh zirtirin, an zirna turin chanchinbu hluite a khawnsak ṭhin. An mamawh an intum theih turin a zirtir a, hei bakah selfhelp group-te zirtirin a zinkual ṭhin bawk.

Mizoten kuhva kan ei nasa a, kuhva pack-na sarang hi ṭawih thei lo a nih avangin, hemi thlakna tur hian hnaha kuhva pack-na siam pawh a enchhin bawk. Hemi atan hian hnah chi hrang hrang - hnahkhar, hnahthial, changel leh a dangte a hmang ṭhin a, hnang phelsinin a chilh a ni. Dawr hrang hrangte model-a hman turin a be bawk.

Hnah hmanga siam hi kuhva pack-na sarang thlakna atan hman a nih chuan, thingtlang mi tam tak tan eizawnna a siam phah thei dawn a, hnah tumtel ringawt leh mau phelsep te zuarin eizawnna atan an hmang ang a, an insiam tawn theihna tur a ni dawn tih chu a suangtuahna leh a duhthusam a nih thu Ruatfela nu chuan Vanglaini a hrilh. Hemi rual hian thuneitu lamin sarang khapna khauh taka an kalpui loh chuan a la hlawhtling thei mai dawn lo tih a sawi bawk. Khapna leh awareness kal kawp a pawimawh hle tih a sawi.

Entrepreneurship (kutkawih eizawnna) :

"Kutkawih eizawnna hi mi tam tak tan din chhuahna a ni a, sorkar hian ngai pawimawhin policy mumal tak nei se, mi tam takin an chhawr dawn a ni. MEDMOC hmanga hma a lakna pawh mi tam takin din chhuah phahna atan an hmang a, kei ngei pawh a chhawr ṭangkai ber zinga mi ka ni. Hemi kawngah hian sorkar pawh a hawizau a, policy mumal tak a neih a ngai. Plastic khapna te hi khauh taka kenkawh ni se chuan, hemi aṭang ringawt pawhin kei ngei pawhin mi tam tak eizawnna ka siam belh ṭeuh thei ang. Ka mi chhawr ṭhinte pawh lehkha thiam tak tak vek an ni a, hei vang hian thuneitu lamin kutkawih eizawnna lam a chawi san a, policy ṭha tak a neih chuan ṭhalaiten an chhawr dawn a ni"