Australia album chart-a pakhatna LP ‘Hybrid Theory’ 20th Anniversary Edition

Australia ramaah chuan Linkin Park Album hmasa ber ‘Hybrid Theory’ chu album hralh kal ber niin an tlangzarh aṭanga kum 20 lai a liam hnuah album chart No.1 a rawn ni leh.

Hybrid Theory 20th Anniversary Edition chu ARIA Albums Chart-ah tunkar atan hian pakhatna a ni a, kum 20 liam taa a dinhmun aiin tunah hian a thleng sang zawk. Kum 20 liam taa an tlangzarh kha chuan No. 8 a ni nghal a. No. 2 hialte pawh thleng mah se pakhatna em chu a la ni ngai lo. An lead singer Chester Bennington kum 2017-a a thih khan No.2 a a inhlangkai leh a ni.

ARIA Albums Chart-ah hian Linkin Park hi an che ṭha ṭhin hle a, Minutes To Midnight (May 2007) leh A Thousand Suns (September 2010) pawh kha pakhatna an lo nihpui tawh bawk a ni.

Hybrid Theory 20th Anniversary Edition-ah hian a original album (CD/vinyl) kha dah tel leh a ni a, Super Deluxe Box awm telin hetah hian video mi la hmuh ngai zen zen loh leh an hla remix, midang an thawhpuina leh live recording eng emaw zat an dahtel a, hei hi Australia lama an fan-te chuan an hlut hle tih a hriat.

Linkin Park hian October 24, 2000 khan an album hmasa ber ‘Hybrid Theory’ hi an tlangzarh a, an hlawhtlinpui nghal rem rem hle a khawvel pumah copy maktaduai 27 an hralh tling a ni.  Recording Industry Association of America (RIAA) chuan ṭum 12 ngawt Platinum certify an pe a, ram 15 chart-ah top 10-ah a lang bawk a, he album-a mi 'Crawling' hmangin Grammy Award-te an dawn phah hial bawk a ni.