MSL Dance Battle Battle zat ve zawh a ni ta

MSL halftime Dance battle chu a zatve ai tam zawh a ni ta. Tun kar kalta khan dance battle vawi li awm lehin, hengah hian Myn’X, BGMX, Monadikos leh Nerds of War te an chak. TBL crew Nerds of War bakah Serpents crew Myn’X leh Monadikos te hi tun MSL dance battle-a chak loh ṭum la nei miah lo an ni.

Thawhlehni zana Zawkawt Serpents leh Chaltlang Ryders inkhelah, Serpents Home crew Myn’x leh Ryders Away crew Crazy Bee te an in hmachhawn a. Heng crew pahnihte hi an member zat pangngai aiin pakhatin an tlem ve ve. Myn’X-ah pali rawn lamin, Crazy Bee ah pathum an lam a, mipa hlang vek an ni. Crazy Bee hian props an hmang ṭha viau chungin team work leh execution lamah Myn’X te hi an pha ta lo.

Ningani zana Tuikual South BC leh Mission Veng Vi­kings inkhelah, Tuikual South Home crew BGMX leh Vikings Away crew Dance & Beatz te an inhma­chhawn ve thung. Dance & Beatz member an rawn kim tawh a, hmeichhe pali an ni. Mahse mipa hlang crew ṭha tak, BGMX hi diffi­culty leh originality lamah an hneh ta lo a ni. BGMX te hi a hma aṭang tawha skills ngah leh dangdai an ni.

Zirtawpni tlaia Chaltlang Ryders leh Zarkawt Serpents inkhelah, Ryders Home crew Sharp Kats leh Serpents Away crew Monadikos te an lam thung. Hmeichhe hlang ve ve an ni a, an cos­tume te leh an che vel pawh an inkhai rual em em. A tawp­ah point khat pawh tling mang loin Monadikos te hi an chak zawk a ni. Mona­dikos te hian concept ṭha tak nen, classroom ni awm takin, dawhkan leh ṭhuthlengte an rawn hmang a, lawm an hloh hle. Zana Khatla TBL leh Zar­kawt BCA inkhel ropui takah TBL Home crew Nerds of War te leh BCA Away crew Anonymous Signs te an inhmachhawn. Nerds of War hi an rawn chungnung hle a, entu mipui lawm pawh a hlawh a; lam zinga sawi zui kai ber an la ni. Anonymous Signs hian an style-ah hip hop leh animation te an hmang a, anmahni tawkin ṭha viau mah se an hneh zo lo.

Heti hian battle vawi 17 neih a ni tawh a, 13 dang hmabak a la awm. A tawpah Final lut tur crew thiam ber pahnih thlan chhuah an ni ang. Tunkar hian Thawhlehni zana Vikings leh Tuikual South match awm tur sawn hlat a nih avangin, Ningani zanah, Ryders home crew Sharp Kats leh BCA away crew Anonymous Signs te an in-battle ang a, Zirtawpni tlaiah TBL home Nerds of War leh Tuikual South away Mystic Movers te an lam ang. Zanah Serpents home Myn’X leh Vikings away Dance & Beatz te an in-battle thung dawn a ni.