LBS Suzuki Youth Icon 2024: September 10-ah intihsiakna ṭan dawn

LBS Suzuki Youth Icon 2024 First Round intihsiakna chu September 10 hian ṭan a ni dawn. LPS Studio, Zarkawtah mi 270 an intihsiak ang.

Mizorama reality television show hmasa ber, Youth Icon hi kum 2006 aṭang khan neih ṭan niin, kumin hi vawi sarih buatsaih a nihna a ni. Youth Icon hmasa ber chu Zoramchhani a ni a, 2007-ah Malsawmtluangi, 2009-ah R. Lalhmangaiha, 2012-ah H. Lalrempuia, 2016-ah K. Lalthlamuankimi leh 2019-ah Zothanpuii te thlan an ni.

Kuminah hian LBS Suzuki, Bawngkawn chu title sponsor niin, Hõm Furniture (Bawngkawn) leh Sailo Agencies Home Appliances (Ramhlun South) ten an sponsor bawk a, lawmmanah hian pawisa fai Rs 4,40,400 sem chhuah a ni ang.

Audition round hi online-a buatsaih niin, Telegram leh WhatsApp kaltlangin mi 453 in zai video an thehlut a, Mizoram chhung aṭangin mi 440 bakah Tripura, Manipur, Mumbai (Maharashtra) leh ram dang Myanmar leh Oman aṭangin mi 13 in an zai video an thehlut a ni.

Audition round paltlang mi 272-ah hian Mizoram district 11 aṭangin tling an awm vek a ni. Aizawlah tam berin mi 139 an tling a, Mamit 26, Serchhip 25, Saitual 19, Champhai 16, Kolasib 15, Lunglei 10, Lawngtlai 8, Siaha 4, Hnahthial leh Khawzawl district aṭangin 3 ve ve an tlin bakah Mizoram pawn aṭangin mi 4-in audition round an pal tlang bawk.

September 21-ah First Round result hi puan a ni dawn a, Top 10 inelna hi October 5 aṭanga neih tur niin, Grand Finale hi October 19 zanah neih a ni ang. Top 10 aṭang hian intihsiakna hi LPS Arena, Falkland-ah neih a ni dawn a, mipui chhim theih turin buatsaih a ni ang.