Aengi'n ama 'original' a ti chhuak

Ṭhazual Award aṭanga hriat lar, ṭhiang zaia (duo) inkawp fuh Aengi leh Rosalyn te chuan 'Nghilh Har Di Hlui' tih chu anmahni YouTube channel Aengi&Rosalyn-ah an dah chhuak a, an hla thar hi Aengi phuah a ni.

Aengi chuan, "Tute pawhin hetiang lam hawi hla hi ngaihbel tur kan nei zel a. Hei bakah hian kan ṭhiandun nena inmil tur kha ka ngai pawimawh ve bawk. Midang phuah mawi tak tak sak tur a awm karah mahni 'original' tih ve theih turin theihna kan nei vein ka hria a, Mizo mipui pawhin an ngaihnat ngei ka beisei," tiin Vanglaini a hrilh

Aengi leh Rosalyn te hi Ṭhazualah 'background singer' aṭanga hriat lar an ni a, kum 2021 Ṭhazual Award-ah Daduhi Khiangte hla 'Ka ngai zual ṭhin' tih chu rawn sain mipui ngaihnat an hlawh hle.

Hemi hnu hian Darbu App-a dah turin K. Hminga phuah 'Rinawm min tiam kha' tih chu an tichhuak a, Darbu App-a an ngaihthlak tam zinga mi a ni. Aengi chuan, "Rilru na hla ringawt lo deuh pawh kan nei a, ti chhuak leh turin hma kan la mek," tiin a sawi a, 'Nghilh har di hlui' hi hla dangin a zui vat turah a ngaih theih ang.