Celeb zinga sum lalut hnem ber Taylor Swift

A ngaihzawng chungchang ringawt khawvelin a buaipui a, mi tam takin ngaihzawng a thlak ngun chu sawisel mah se a sum lakluhin a kiam phah chuang lo. Celeb zinga khawvela sum lalut hnem ber a ni tho tho.

Forbes chanchinbuin milarte kum khat sum lakluh zat a tarlanah Taylor Swift chu sum lalut hnem ber a ni a, album hlawhtling leh ropui nei Adele pawhin a pha tlat lo. Swift hian June 2015 aṭanga June 2016 chhung khan USD mtd 170 zet a lalut.

Taylor Swift-i sum lakluhna lian ber chu 1989 tour a ni a, North America-ah phei chuan a hlawhtling zual hle a, N. America-a tour zawng zawngah, a hun tarlan chhung, June 2015 aṭanga July 2016 chhungin tour hlawhtling ber a ni. N. America bikah chauh hian tour aṭangin, chhiah leh senso paih hmain USD mtd 200 a lalut a ni. Hei bakah hian, music kaihhnawih miah loah sum
ṭhahnem tak a lalut bawk. A sum lakluhna lian dang, music kaihhnawih lote chu Apple, Diet Coke leh Keds te a ni.

Nikum kha chuan Swift hian US mtd 80 lalutin pariatnaah chauh a awm a, tunah chuan a hlawhtling zual ta hle.

One Direction chu sum lalut hnem pahnihna an ni. Anni hi an mimal sum lakluhte belhkhawma chhut a ni a, music chawlhsan lailawk rih mah se, an band hming ang pawhin sum ṭhahnem tak an la thawk chhuak tho. One Direction-in thla 12 chhunga an sum lakluh zawng zawng hi USD mtd 110 zet a ni.

Pathumnaa lang chu zaithiam ni loin, ziakmi, James Patterson a ni a, thla 12 chhungin USD mtd 95 zet a lalut. A lehkhabu ziah zingah Alex Cross series te, Women's Murder Club te, Maximum Ride te, Daniel X te, Witch and Wizard series te a hlawhtlinpui hle.

Top 10 zingah futbol thiam pahnih Cristiano Ronaldo leh Lionel Messi te an lang. Cristiano Ronaldo hi palinaah a lang pha a, Messi hi pariatnaah a lang thung.

Milar sum lalut hnem 10

Taylor Swift - $ maktaduai 170

One Direction - $ maktaduai mtd 110

James Patterson - $ maktaduai mtd 95

Cristiano Ronaldo - $ maktaduai mtd 88

Dr. Phil McGraw - $ maktaduai mtd 88

Kevin Hart - $ maktaduai mtd 87.5

Howard Stern - $ maktaduai mtd 85

Lionel Messi- $ maktaduai mtd 81.5

Adele - $ maktaduai mtd 80.5

Rush Limbaugh - $ maktaduai mtd 79