Praise On-a tel tura sawmna thawn mek

Synfo-in KṬP branch te puala zaia intihsiakna, Praise On a buatsaih turah KṬP branch hrang hrangah sawmna a thawn chhuak mek. Praise On-ah hian mimalin a tel theih dawn lo a, branch aiawh zela tel tur a ni ang. Audio album emaw, music video album la siam lote tan tel theih a ni.

Synfo chuan intihsiaknaa tel tur hian KṬP branch hrang hrangah sawmna a thawn chhuak a, sawmna hmu kher lo pawhin chanchinbu katlanga an puanzar hi sawmnaa ngai turin an ngenin an duh a ni. He intihsiakna hi Lunglei Chanmari, Serchhip Kawnpui, Champhai Vengthlang, Kolasib Diakkawn, Mamit leh Mission Veng Branch-ah te audition neih a ni ang a, heta tiṭhate hian Aizawlah intihsiakna an nei chhunzawm zel dawn a ni. Heng branch tarlanah te hian July 30 thlengin tel turte chuan hming pek luh theih a ni.

Praise On-a pakhatna hian Rs. 80,000 a dawng ang a, pahnihnain Rs. 40,000, pathumnain Rs. 20,000 leh top 10-a tling chinten Rs. 5,000 ṭheuh an dawng ang.