J. Lalremruati Chhuak tharten an tluk lo

An tleirawl chhuah deuh phat a, a nuṭa nena Zoram khawvel deng chhuak tawh kha a ni a, khami hnuah khan zaithiam tam tak an rawn chhuak tawh a, an chhuak mek zel bawk a, mahse Sentei, J. Lalremruati, J&J tia kan hriat ṭhina mi kha tunlaia zaithiam chhuak thar tak tak ten an la tluk thei lo.

Sentei hian a vawi hnihna atan Dafodils Ṭhazual Lengzem chart-ah pakhatna a rawn hauh leh. Sentei hla 'Inhrilh dun ang' tih hi February thlaa a dah chhuah chauh kha a ni a, mahse heti tak hian hlawhtlinna a chang hmaa a chang sang a ni. Hei hian hmana Sentei kha a la zaithiam reng ni loin, hma a sawn a, a zaithiam zual sauh zawk tih a lantir.

Hmanrua a awm ṭha tawh a, idea a ṭha tawh a, hetiang karah hian zaithiamteah inelna a nasa hle. Music ṭha, changkang a tam tial tial a, a zaite pawhin zai hi tih tak tak tlak a nihzia an hre tial tial a, an zaithiam tial tial. Hetiang karah hian pakhatna a la rawn hauh thei a ni. Chennai leh phai lama a awm chhungin nasa takin hma a sawn tih loh rual a ni lo ang.

Mizoramah chauh a ni lo a, tunah hian Chennai-a agent ten khu lama chhuk thla leh turin an sawm a, contract ziahpui leh turin an thlêm mek a ni. Sentei hian Mizorama awm hlen ve a duh deuh tawh a, contract a ziahpui leh a nih pawhin hun rei tak daih chuan a ziah tawh loh hmel.

Essy a kâng sang tial tial a, pathumnaa a rawn lan nghal thut mai piah lamah tunah chuan pahnihnaah a ṭhu ta. Essy hla 'Hey' hi a music a changkang a, hip-hop lam pawl lek lek a ni a, a hla a changkang viau. A music video a ṭha a, dancer a nei ṭha bawk a, hei hian a video a tihmuhnawm zual. Pakhatna pawh a la luah ngei a rinawm.

A hmaa pahnihna, Kolkata Mizo Student hla 'Kan ding (Zoram tan)' tih chu pathumnaah a chhuk thla a, Christy-i hla Chhingkhual D chu a ngai, palinaah bawk a ṭhu leh a, C. Sanga pawh panganaah bawk a awm leh. Top 10-ah hian Christy hla thar 'Tleitiri' tih chu 10-naah a rawn lang thar a, Essy hla pakhat zawk, a music video hmasa ber Inchhuang Mai Lo La chu top 10 aṭangin a tawlh liam ta thung.

Dafodils Ṭhazual Lengzem

1 J. Lalremruati - Inhrilh dun ang

2 Essy - Hey

3 Kolkata Mizo Student - Kan ding ( Zoram tan)

4 Christy - Chhingkhual D

5 C Sanga - Chhingkhual Lenmawi

6 Lawmi Khiangte - Mangtha

7 DJ Lalvenhimi - Khua tuah loh di

8 Sumeona - Ka bang ngei ang

9 K Lalhmangaihthangi - I dawn sual em ni

10 Christy - Tleitiri