Netflix India content head thu zawhfiah turin ko

Ministry of Information and Broadcasting chuan Netflix India-a Head of Content chu web series, ' IC 814: The Kandahar Hijack' ah hijacker te hming tihdanglam nia sawi a nih chungchangah thu zawhfiah turin a ko.

Web series hi kum 1999, December 24-a Indian Airlines Flight 814 hijack chungchang ziahna, 'Flight Into Fear : The Captain's Story' tih lehkhabu behchhana siam a ni. Thlawhtheihna hijack-tute hi Ibrahim Athar, Shahid Akhtar Sayed, Sunny Ahmed Qazi, Mistri Zahoor Ibrahim, leh Shakir te an ni a, mahse series-ah hian hming tak anga tarlang loin, 'Shankar,' 'Bhola, bakah 'Chief,' 'Doctor,' leh 'Burger' tiin an sawi a ni. Hei hian social media lamah sawisel a hlawh nasa hle a, IC 814 series chu boycott turin user lamin an nawr. He series siamtu, Anubhav Sinha leh Trishant Srivastava te chu thil thleng dik tak her danglamah an puh.