Fashion Fusion 2015

Kum 2010 aṭanga buatsaih ṭan tawh Fashion Fusion chu neih a ni leh dawn hnai ta. Zofashion-ah hnuhma thar a nei ang em?

Kum 2010 khan Vakiria Institute of Fashion Technology (VIFT) chuan an zirlai kal chhuak turte kutchhuak pholanna, Fashion Fusion hmasa ber an lo buatsaih tawh a, he fashion show ngaihhlut hlawh tak hi March 27, 2015 hian neih a ni leh dawn a, 3:16 Plan Solution nen ṭangkawpin he show hi kalpui a ni ang.

Fashion Fusion vawi rukna tur hi Lal Thanhawla Auditorium, Congress Bhawan chungah neih a ni dawn. Kum dangah chuan a kal turte hi sawm bik chiah an ni ṭhin a, fashion lama tui kal châk an awm ṭhin avangin kumin hian mi 100 tan ticket an siam dawn a, entry ticket hi Rs 200/- man niin Vakiria, Lalbuaia Shopping Complex leh show neih dawnin a hmunah lei theihin a awm ang.

VIFT-a zirlaite hian kum khat chhung fashion designing and tailoring hi an zir a, anni hian designing thiam mai ni lo a taka puanṭhui thiam nghal turin zirlaite an buatsaih. Instructor lamin hmun danga an zir ṭhin bakah Mizote mil tur thiamna hrang hrang an zirtir ṭhin a, an thil zirte hi model 20 rual zetin an phochhuak dawn a ni.

Kuminah hian endiktu turin Numami, Magic 'n' Creations, Lunglei; Papuia, VSE, Chaltlanga instructor ni mek leh Mizo puan ṭhui zinga lâr leh hlun ber pawl Dawli-te an nim ang. Anni hian VIFT zirlaite kutchhuak hi a hmunah kal chilhin an endik vek tawh nghe nghe a ni.

Fashion Fusion hi kum tin hmun hrang hrangah neih ṭhin a ni. Kum 2010 khan Electric YMA Hall-ah bul ṭan a ni a, kum 2011-ah Aijal Club sak thar hnuai berah neih a ni a, kum 2012-ah Zarkawt Recreation Centre-ah neih a ni. Kum 2013-ah Chanmari YMA Hall-ah an nei a, nikum 2014 khan Ramhlun Indoor Stadium sak tharah neih a ni. Kumin hian Mizorama audirorium thar leh changtlung ber pawl tura ngaih Lal Thanhawla Auditorium-ah neih a ni ang.

Fashion Fusion danglamna ṭhin chu a hminga 'Fashion Fusion' tih a put chhan 'fusion wear' hmanga inelna an nei ṭhin hi a ni. Zirtirtu lam aṭanga theme thlan leh anmahni mimal theme hmang kawpin kawr an siamchhuak ṭhin. Kum tin he fusion wear atan hian theme hrang hrang neih ṭhin niin, kuminah 'history of fashion' hmangin inelna buatsaih a ni dawn a; model langsar tak takte an inlan dawn a, BDA, Champhaiin model-te hi a chei dawn a ni.