Christian metal band Stryper album thar ‘Even the Devil Believes’

Christian heavy metal band, mainstream lama hriat hlawh hmasa ber pawl Stryper chuan Zirtawpni khan an studio album 13-na ‘Even the Devil Believes’ chu an tlangzarh a, streaming platform hrang hrangah ngaihthlak theih leh lei theihin a awm tawh.

‘Even the Devil Believes’-ah hian track 11 a awm a, Firehouse bassist ṭhin Perry Richardson-a'n kum 2017-a an band a zawm hnua an album tihchhuah hmasa ber a ni. Richardson hi bassist a nih piah lamah background vocalist a ni nghal bawk.

Stryper hian an album thar tihchhuah pah fawm hian Zirtawpni leh Inrinni khan LIVE Virtual Lis­tening Parties an buatsaih a, hetah hian an fan-te nen an album thar hi an ngaithla thei a ni. September 8 hian Virtual Listening Parties hi buatsaih leh an tum a ni. 

Vocalist/guitarist Michael Sweet chuan,"Khawvelin hun harsa tak a hmachhawn karah engtin tin emaw album thar kan sual puitling thei a, kan album ṭha ber pawh niin ka hria.

Kum 36 liam hnuah pawh metal khawvelah 'biak-in' lian lo tak kan din thei hi lawmawm ka ti. Kan album thar hi in ngaihthlak hlan kan nghakhlel hle a ni," tiin album thar an tlangzarh chungchang hi a sawi.

Kum 1983 kha  Stryper hi Roxx Regime tih hmingpuin an indin a, mahse rei lote hnuah Stryper tiin an band hming chu thlak zuiin an hla pawh Kristian rinna lam hawi vek a ni. An studio album pathumna 'To Hell with the Devil' phei chu an hlawhtlinpui hle a, platinum sales an dawng pha nghe nghe.

Album hi khawvel pumah copy maktaduai 10 chuang an hralh tawh a, Christian band mah ni se  “Calling on You,” “Honestly,” leh “Always There for You,”-te chu Billboard Top 40 an thlenpui thei a, MTV Top 10-a hla pahnih a ruala nei thei band hmasa ber ni bawkin “Free” leh “Honestly” hmangin hre record hi an siam a ni.

An band line-up hi an thlak fo a, tunah chuan Michael Sweet (lead vocals, guitar), Robert Sweet (drums), Oz Fox (guitar) leh Perry Richardson(bassist)-te chu member an ni mek.

Stryper hian Zirtawpnia album thar an tlangzarh rual khan music video thar "Do Unto Others" chu an tlangzarh nghal a, Stryper kan hriat ṭhin an music bawk kha an play leh a, an zai ngainatute tan chuan You­Tube lamah a en theih a ni.

1.     Blood From Above

2.     Make Love Great Again

3.     Let Him In

4.     Do Unto Others

5.     Even The Devil Believes

6.     How To Fly

7.     Divider

8.     This I Pray

9.     Invitation Only

10.     For God & Rock 'N' Roll

11.     Middle Finger Messiah