Khawiah nge mi hausate kha? Infiammi tlachhe lar zualte

An hunlai chuan sum leh pai an thawkchhuak hnem em em a, mahse an nun danin a zir loh avangin maktaduai têl pawhin a daih lo. Awm dan leh nun dan thiam loh chuan eng anga pawisa tam pawh hian mi a daih lo fo ṭhin a nih hi.

Khawvela infiammi lar, sum tam tak thawk chhuak kha an ni a, an ropui ṭhin a, mi tam takin an awt ṭhin. Mahse an nunin a zir miau si loh chuan eng an ang rei thei tak tak lo. Tunah chuan mi awhawm tak nia kan hriat ṭhinte kha an awhawm ta lo hle mai.
Chicago Bulls vanglai kha chuan Dennis Rodman hming pawh kan lam ri fo ṭhin a nih kha. Court-ah mite mak tih a hlawh a, a thiamzia kha hahipa an sawi a ni fo. Tunah erawh a dinhmun tlakchhiat nasatzia hi miten hahipin an sawi ve ta thung. A tattoo, a hnar beh, a sam rawng chi hrang hranga a ṭial ṭhin te, a defensive style te kha mite hmuh duh leh ngaihven a ni ṭhin. Tuna miten a chanchina an ngaihven chu USD 808,935 a bat mek hi engtin nge ani tehlul hian a pek tlak ang, tih hi a ni. A nupui a ṭhen a, a nupuiin dân hmangin a bei lêt leh a, a fate enkawlna tur leh a nupui ṭhen tak enkawl zuina tur sum court-in pe turin a ti a, pek tur a nei lo mai a ni tawh lo, amah pawh a inenkawl zo ta mang lo.
Court-a a speed ṭhat ropuizia leh a ball han ken vel zei leh thiamzia kha...an tumpuite tan pawha ven harsa ber a ni ṭhin. Tunah pawh Allen Iverson hi a ukil chuan court-ah pawh vênhim harsa a la ti tho mai! Thubuai a nei zawn zut reng tawh a, sum a thawh chhuah hnem ṭhin tehreng nen tunah chuan court kalna velah ringawt pawh a neih sum a zo ta. A bodygaurd ṭhin a khawih leh hnu phei chuan a buai a zual. Court chuan a bodygaurd, Marlin Godfrey chu USD 260,000 zet pe turin a ti a, hei hi chu a pe thei mai thei, mahse a nupui hluiin amah leh a fate inenkawlna tura sum a phût hi chu pek a harsa ve tawh viau ang.
'Iron' Mike Tyson pawh tutlawm a, World Heavyweight Champion-a ṭum nga champ thei awm chhun, Evander 'The Real Deal' Holyfield hi, a beng Mike Tyson-an ei zawhsak mah se sum a hnek chhuak hnem. Hei mai bakah company hrang hrang nena an thawhdunnaah sum tam tak a hailut ṭhin bawk. Hmeichhe lamah a nun a thlahdah deuh hret a, a buai a zual ta a ni. Kum 2008 khan Atlanta-a a in, USD mtd10 man zet chu a ba a tlâk theih loh avangin lilâmsak a ni tawh. A hmeichhe kawp ṭhin, a nupui ṭhin a ni ber ang chu, paruk zinga pakhat, fa a neihna chuan amah leh a fate enkawlna tur tiin court-ah a dil a, court chuan USD 550,000 pe turin a ti a, mahse pek tur a nei tawh lo!
Olympic-a gold medal ṭum thum ngawt lo la tawh, Marion Jones pawh hi eng nge a an zel dawn a hriat loh. Damdawi hman phal loh avangin a hming a chhia a, a medal leh award zawng zawng an lakletsak vek. Hei mai hi a ni lo, pawisa lem siam lamah a inhnamhnawih leh bawk a, thubuai a nei leh mek. Nun dan thiam loh chuan sum tam tak pawh hian rei a lo daih meuh lo a ni e.