Patch thar leh Token

World of Warcraft player-te tana thu lawmawm, Thawhlehni aṭang khan patch thar an dah chhuak a, hemi bakah, tunkar chhung aṭang hian pawisa tak takin gold pawh a lei theih ṭan beisei a ni.

Thawhlehni aṭang khan 6.1.2 patch an dah chhuak thar a, hei bakah hian token chu America region tan bik an siam thar bawk a, khawvel hmun dangah pawh a awm ve nghal thuai tura ngaih a ni. Player-ten World of Warcraft Token hi in-game shop aṭangin pawisa tak takin an lei thei tawh dawn a, player, he game atchilhtute tan chuan thu lawmawm tak a ni ngei ang. Thla khat chhung subscribe te tan USD 20 a ni ang a, hei hi dan pangngaia thla tin subscribe man aiin USD 5-in a to zawk.

Hetianga Blizzard-in thil thar a pho chhuah mek lai hian Blizzard leh Chinese mobile game company pakhat nen inhmuhmawhna an nei mek. Shanghai-a innghat Lilith Games chuan nikum khan Soul Clash game a tichhuak a, he a game tihchhuahah hian World of Warcraft-a character tam tak an la chhawng niin Blizzard chuan a hria a, dan hmangin hma an la dawn.

Lilith Games hian Elves, Panda leh minotaur te an game siam, Soul Clash-ah hian an telh a, heng character te hi Blizzard chuan an phalna loa la chhawng ve ringawt nia ngaiin thubuai an siam a ni. Soul Clash siamtute hi chanchinbu miten an be pawp thei lo a, amaherawhchu Lilith Games vek hian US-a game siamtu uCool te chu an game siam, Soul Clash tihdan lo chhawnga puhin thubuai an siam ve tho bawk.